50:282  a  la  volonte  de  Dieu,  et  iettent  le  sort,  comme  d'une  chose  qui  passe  leur  sens.  Et  la  raison?  Comme  i'ay  desia  dit,  il  faloit  que  les  Apostres  fussent  choisis  d'en  haut  par  un  privilege  special,  pour  ce  que  c'estoyent  ceux  qui  devoyent  publier  l'Evangile  par  tout  le  monde.  Or  sainct  Paul  a  este  eleu  depuis.  Mais  quoy  qu'il  en  soit,  il  y  a  eu  un  privilege  egal,  pour  ce  que  la  revelation  est  venue  du  ciel,  pour  declarer  qu'il  faloit  qu'il  exercast  cest  office  :  il  a  este  ravi  par  dessus  le  troisieme  ciel,  comme  nous  avons  veu  qu'il  a  este  approuve  en  toutes  sortes:  et  en  la  fin  que  Dieu  luy  a  voulu  donner  instruction  plus  ample,  et  qu'il  l'a  marque  pour  Apostre  des  Payens,  il  a  eu  quant  et  quant  le  sainct  Esprit  qui  a  parle,  et  a  prononce  l'oracle  d'en  haut.  Voila  donc  sainct  Paul  qui  n'a  point  este  choisi  par  le  moyen  des  hommes.  Cela  n'est  pas,  (comme  desia  nous  avons  dit)  un  vice  en  ceux  qui  sont  pasteurs  et  ministres  de  l'Eglise:  mais  il  y  avoit  ce  privilege  requis  en  sainct  Paul,  afin  qu'il  se  peust  accomparer  a  Pierre  et  a  Iean,  et  a  tous  ceux  qui  avoyent  converse  en  la  compagnie  du  Fils  de  Dieu,  cependant  qu'il  avoit  habite  en  ce  monde  et  en  ceste  vie  mortelle.  Nous  voyons  donc  maintenant  en  somme,  ou  sainct  Paul  a  pretendu.  Or  par  cela  nous  sommes  enseignez  que  toute  la  reverence  que  nous  devons  a  ceux  qui  nous  portent  la  parole  de  Dieu,  et  qui  ont  le  titre  de  pasteurs,  n'est  pas  pour  empescher  que  Dieu  ne  soit  tousiours  ouy,  et  que  nostre  Seigneur  Iesus  ne  soit  le  maistre  unique  de  l'Eglise:  il  nous  faut  bien  retenir  ce  poinct,  car  autrement  nostre  foy  sera  tousiours  subiete  a  beaucoup  de  varietez:  et  celuy  qui  sera  le  plus  habile  d'entre  les  hommes  le  gagnera:  et  nous  n'aurons  rien  de  certain:  mais  plustost  que  nous  changerons  de  iour  en  iour,  voire  de  minute  en  minute.  Notons  bien  donc  que  si  on  allegue  les  noms  d'Eglise,  de  Prelats,  d'Evesques,  tousiours  il  faut  la  revenir,  qu'ils  ne  peuvent  monter  plus  haut  que  d'este  serviteurs  de  Iesus  Christ,  et  approuvez  de  luy.  S'ils  ont  este  eleus  par  ordre  legitime,  avec  invocation  du  nom  de  Dieu:  et  puis,  qu'on  les  ait  choisis  aussi  tels  qu'il  appartient,  et  qu'il  y  ait  de  quoy  pour  exercer  leur  office.  Voila  les  marques  dont  nous  pourrons  scavoir  et  estre  bien  certifiez  quels  sont  les  Pasteurs  que  Dieu  advoue  et  accepte.  Or  cependant  ce  n'est  pas  assez  que  un  homme  soit  appele  en  l'estat:  mais  il  faut  qu'il  exerce  la  charge  qui  luy  est  commise:  comme  sainct  Paul  ne  dit  pas  simplement  qu'il  ait  este  ordonne:  mais  en  s'attribuant  le  nom  d'Apostre,  il  declare  qu'il  est  envoye  pour  porter  le  message  de  salut,  et  pour  annoncer  l'Evangile  au  monde.  Ceux  donc  qui  veulent  estre  receus  comme  Evesques  et  Prelats,  il  faut  qu'ils  enseignent:  et  s'ils  sont  des  idoles