49:282  gaudium  speret,  quos  videbit  spiritualibus  evangelii  divitiis  affluere.  30.  Obsecro  autem  vos  fratres,  per  Dominum  nostrum  Iesum  Christum,  et  per  dilectionem  spiritus,  ut  concertetis  mihi  in  precibus  vestris  pro  me  ad  Deum:  31.  ut  liberer  ab  incredulis  in  Iudaea:  et  ut  ministerium  meum,  quod  suscipio  erga  Ierusalem,  acceptum  sit  sanctis:  32.  ut  cum  gaudio  veniam  ad  vos  per  voluntatem  Dei,  unaque  vobiscum  refociller.  Deus  autem  pacis  sit  cum  omnibus  vobis.  Amen.  30.  Obsecro  autem  vos  fratres.  Ex  plurimis  locis  satis  scitur  quanta  invidia  flagraverit  Paulus  in  sua  gente  ob  falsas  delationes,  quasi  doceret  defectionem  a  Mose.  Noverat  quantum  possint  calumniae  ad  gravandos  innocentes:  praesertim  apud  eos  qui  inconsiderato  zelo  feruntur.  Accedebat  etiam  testificatio  spiritus,  cuius  meminit  Actor.  20,  23,  qua  subinde  praemonebatur,  sibi  imminere  Ierosolymis  vincula  et  afflictiones.  Itaque  quo  maius  cernebat  periculum,  eo  magis  permovebatur.  Hinc  tanta  sollicitudo  in  commendanda  ecclesiis  salute  sua:  nec  miremur  tam  anxium  fuisse  de  vita  sua,  in  qua  tantum  ecclesiae  periculum  agi  sciebat.  Testatur  ergo  quantopere  angeretur  pium  pectus,  quae  in  hac  obtestatione  inest  vehementia,  dum  ad  nomen  Domini  addit  s  p  i  r  i  t  u  s  dilectionem,  qua  se  mutuo  sancti  complecti  debent.  Caeterum  in  tanta  trepidatione  pergere  non  desinit,  neque  sic  periculum  reformidat  quin  obire  libenter  paratus  sit:  sed  remediis  a  Deo  sibi  datis  se  instruit.  Advocat  enim  ecclesiae  suppetias,  ut  eius  precibus  adiutus,  solatium  inde  aliquod  sentiat,  iuxta  Domini  promissionem:  Ubi  duo  aut  tres  congregati  erunt  in  nomine  meo,  ibi  in  medio  eorum  sum:  et:  De  quacunque  re  consenserint  in  terra,  eam  obtinebunt  in  coelis.  Et  ne  defunctoriam  esse  commendationem  quis  putet,  per  Christum  et  per  dilectionem  spiritus  eos  obsecrat.  Dilectio  autem  spiritus  vocatur,  in  qua  nos  Christus  coniungit:  quia  non  carnis  est  nec  mundi,  sed  ab  eius  spiritu,  qui  vinculum  est  unitatis  nostrae.  Quum  ergo  tantum  sit  Dei  beneficium,  fidelium  precibus  adiuvari,  quod  ne  Paulus  quidem,  selectissimum  illud  Dei  organum,  sibi  negligendum  duxerit:  cuius  ignaviae  futurum  est  si  nos  miselli  et  nihili  homunciones  ipsum  contemnimus?  Caeterum  ex  talibus  locis  captare  ansam  ad  intercessiones  sanctorum  mortuorum  adstruendas,  nimiae  impudentiae  est.  v  Ut  concertetis  mihi.  Erasmus  non  male  reddidit:  ut  laborantem  adiuvetis:  sed  quia  loquutio  graeca  Pauli  plus  habet  energiae,  reddere  ad  verbum  eam  malui.  Nam  et  per  vocabulum  certaminis  significat  quibus  angustiis  prematur:  et  quum  iubet  sibi  adesse  in  hoc  certamine,  docet  quem  af-  21