29:282  multorum  exitium.  Nec  enim  ea  quae  debebatur  cura  adhibetur:  vilius  praestantiori,  puta  corpus  animae  praefertur,  voluptas  et  delectatio  educationi  et  eruditioni,  quae  tamen  illis  longe  maiore  in  pretio  esse  quam  caetera  omnia  debebat.  Non  sic  Anna,  quae  filium  nominatim  dicitur  non  quinquennem  sexennemve,  sed  admodum  puerum  et  recens  ablactatum  adduxisse,  curaeque  pontificis  tradidisse,  sese  materna  automate  abdicasse,  ut  Deo  promissum  dicatumque  offerret.  Quare  quum  sponte  infantili  bus  blanditiis  non  procrastinat,  sese  privat,  ut  Deo  consecratum  offerat,  satis  ostendit  se,  neque  invitam,  neque  moerentem,  id  facere,  sed  licet  lactatura  infantem  domi  ad  tempus  resederit,  tamen  opportunitatem  exspectasse  Deo  votum  plene  persolvendi.  Caeterum  quod  dicuntur  adduxisse  puerum  ad  Helin  et  Anna  illi  dixisse  :  Domine  mi,  vivit  anima  tua,  sum  mulier  illa  quae  stabat  tecum  hic  supplicando  Iehovam:  pro  puero  isto  supplicabant,  praestetque  mihi  Iehova  petitionem  meam,  quam  petebam  ab  eo  :  quamobrem  ego  quoque  commodatum  restituo  eum  Iehovae  omnibus  diebus  quibus  fuerit,  ipse  commodatus  est  Iehovae:  primum  expendenda  vox  illa:  Domino  mi.  Neque  vero  pluribus  est  disputandum,  an  summo  sacerdoti  fuerit  ille  titulus  attributus,  tantum  hunc  fuisse  linguae  hebraeae  usum  observandum.  Atque  esse  quasdam  nationes  et  regiones  in  istiusmodi  honorificis  appellationibus  politiores  et  profusiores  quam  alias  videmus:  quare  ne  quid  hic  ambitione  peccatum  putemus,  equidem  hoc  ad  patriam  consuetudinem  referendum  existimo,  et  hanc  simplicissimam  esse  salutationem:  quod  Iudaei  tam  aliqua  dignitate  inter  se  praeditos  quam  etiam  ignotos,  hoc  honore,  nempe  domini  appellatione,  afficerent.  Praecipuum  vero  caput  huius  historiae  considerandum  superest:  Annam  puerum  adduxisse^  quem  Deus  ipsi  dederat  Quibus  iterum  verbis  idem  quod  superius  diximus,  quum  Samuelem  eum  nuncupavit,  ipsa  testatur.  Palam  enim  suam  a  Deo  exauditam  supplicationem  profitetur:  neque  enim  tantum  datum  infantem  sibi  ait,  sed  precibus  suis  datum:  minime  quidem  tanquam  precum  suarum  meritis  istud  tribuat,  sed  non  ignara  Deum  ita  suorum  exercere  fidem  velle,  et  aditum  ad  se  precibus  eorum  patefacere,  ut  certiores  faciat  suos,  se  in  veritate  ipsum  invocantes  exauditurum.  Quod  magis  etiam  confirmat  dum  ait  ad  Helin:  Anima  tua  vivit.  Neque  vero  arbitrandum  illam  per  animam  Heli  iurasse,  quod  plane  esset  idololatricum.  Neque  enim  per  alterius  quam  Dei  nomen  iurare  licet.  Quare  per  Dei  nomen  iurantes,  iudicem  illum  nostrum  esse  profitemur,  ante  cuius  tribunal  olim  omnes  sisti  necesse  sit.  Anna  itaque  minime  voluit  in  mortalem  quae  viventis  Dei  sunt  propria  trans-