1:282  disseramus  loco,  tum  ad  hanc  tractandam  postea  descendamus.  4.  Quendam  inesse  humanae  menti,  naturali  instinctu,  divinitatis  sensum,  extra  controversiam  ponimus:  siquidem,  ne  quis  ad  ignorantiae  praetextum  confugeret,  quandam  sui  numinis  intelligentiam  universis  Dominus  instillavit.  Ut  quum  ad  unum  omnes  intelligant  Deum  esse,  et  suum  esse  opificem,  suo  ipsorum  testimonio  damnentur,  quod  non  et  illum  coluerint,  et  eius  voluntati  vitam  suam  consecrarint.  Sane  sicubi  Dei  ignorantia  quaeratur,  nusquam  magis  exstare  posse  eius  exemplum  verisimile  est,  quam  inter  obtusiores  populos,  et  ab  humanitatis  cultu  remotiores.  Atqui  nulla  est  etiam,  ut  ethnicus  ille  ait,  1)  tam  barbara  natio,  nulla  gens  tam  efferata,  cui  non  insideat  haec  persuasio,  Deum  esse.  Et  qui  in  aliis  vitae  partibus  minimum  videntur  a  belluis  differre,  quoddam  tamen  perpetuo  religionis  semen  retinent.  Adeo  penitus  omnium  animos  occupavit,  adeo  tenaciter  omnium  visceribus  inhaeret  communis  ista  praesumptio.  Nulla  ergo  quum  ab  initio  mundi  regio,  nulla  urbs,  nulla  denique  domus  fuerit,  quae  religione  carere  posset,  in  eo  tacita  quaedam  confessio  est,  inscriptum  omnium  cordibus  divinitatis  sensum.  Quin  et  idololatria  huius  conceptionis  amplum  est  documentum.  Quam  enim  non  libenter  se  deiiciat  homo,  ut  alias  prae  se  creaturas  suspiciat,  scimus.  Proinde,  quum  lignum  potius  et  lapidem  colere  malit,  quam  ut  nullum  putetur  habere  Deum:  constat  vehementissimam  istam  esse  de  numine  impressionem,  quae  adeo  ex  hominis  mente  obliterari  nequeat,  ut  facilius  sit  naturae  affectum  frangi;  ut  2)  certe  frangitur,  dum  homo  ex  illa  naturali  inflatione  ad  infima  quaeque  sponte  se  demittit,  quo  Deum  revereatur.  5.  Quare  vanissimum  est  quod  a  quibusdam  dicitur:  paucorum  vafritia  et  calliditate  excogitatam  esse  religionem,  ut  hac  arte  simplicem  populum  in  officio  continerent;  quum  tamen  ipsi,  qui  aliis  autores  erant  Dei  colendi,  nihil  minus  crederent  quam  aliquem  esse  Deum.  Fateor  quidem  plurima  in  religione  commentos  esse  astutos  homines,  quibus  reverentiam  plebeculae  iniicerent  et  terrorem  incuterent,  quo  haberent  obsequentiores  eius  animos;  sed  id  nusquam  obtinuissent,  nisi  iam  prius  constanti  illa  de  Deo  persuasione  imbutae  fuissent  hominum  mentes,  ex  quo  velut  semine  emergit  ad  religionem  propensio.  Ac  ne  illi  ipsi  quidem  qui  religionis  titulo  callide  rudioribus  imponebant,  Dei  conceptione  prorsus  vacasse  credendi  sunt.  Tametsi  enim  exstiterunt  olim  nonnulli,  et  hodie  non  pauci  comperiuntur,  qui  Deum  esse  negent:  velint  tamen  nolint,  1)  Cicero  de  natura  deorum  1,  16.  2)  quemadmodum  1550  et  seqq.