51:281  281  SUR  L'EPITRE  AUX  EPHESIENS.  282  le  moyen  qui  nous  est  ici  propose,  c'est  a  scavoir  de  s'adresser  a  nostre  Seigneur  Iesus  Christ.  Car  il  y  a  deux  extremitez  mauvaises,  et  dont  il  nous  faut  bien  garder.  L'une,  c'est  que  nous  n'imaginions  pas  que  nous  soyons  venus  a  Iesus  Christ,  pour  estre  dignes  qu'il  nous  face  participans  de  ses  biens.  Et  comment  ce  vice-la  pourra-il  estre  corrige?  Quand  nous  serons  amenez  a  l'election  gratuite  de  Dieu.  Car  voila  pourquoy  les  hommes  presument  tant  de  leur  franc-arbitre:  voila  sur  quoy  aussi  ils  bastissent  l'opinion  qu'ils  ont  conceue  de  leurs  merites  et  de  leur  dignite:  c'est  a  scavoir,  pource  qu'ils  ne  cognoissent  pas  qu'ils  ne  sont  rien,  sinon  d'autant  qu'ils  sont  acceptez  de  Dieu  par  sa  pure  bonte  et  gratuite,  selon  qu'il  les  avoit  desia  eleus  en  son  conseil  eternel.  Nous  ne  pouvons  donc  aucunement  attribuer  le  commencement  de  nostre  salut  a  Dieu,  sinon  que  nous  confessions  ce  qui  nous  est  ici  monstre,  c'est  a  scavoir,  que  nous  estions  du  tout  damnez  et  maudits  quand  il  nous  a  adoptez:  et  nous  avons  commence  d'estre  adoptez  de  luy,  d'autant  qu'il  nous  avoit  predestinez  auparavant  et  devant  la  creation  du  monde.  Voila  pour  un  item.  Il  y  a  la  seconde  extremite  mauvaise,  dont  il  nous  faut  garder  aussi  bien:  c'est  de  speculer,  comme  beaucoup  de  fantastiques  qui  disent,  Ho,  de  moy,  ie  ne  scauray  iamais  comment  Dieu  m'a  eleu:  il  faudra  donc  que  ie  demeure  en  ma  perdition.  Ouy,  mais  c'est  par  faute  de  venir  a  Iesus  Christ.  Comment  scavonsnous  que  Dieu  nous  a  eleus  devant  la  creation  du  monde?  C'est  quand  nous  croyons  a  Iesus  Christ.  Nous  avons  desia  dit  que  la  foy  procede  de  l'election,  et  c'en  est  le  fruict,  qui  monstre  que  la  racine  est  cachee  au  dedans.  Celuy  donc  qui  croit,  est  asseure  par  ce  moyen,  que  Dieu  a  besongne  en  luy  :  et  la  foy  est  comme  le  double  que  Dieu  nous  baille  de  l'original  de  nostre  adoption.  Dieu  a  son  conseil  eternel,  et  il  se  reserve  tousiours  l'original,  et  comme  le  principal  registre,  dont  il  nous  donne  la  copie  par  la  foy.  Nous  parlons  ici  a  la  facon  des  hommes  :  car  nous  scavons  que  Dieu  n'a  ne  papier  ne  parchemin  pour  nous  escrire:  et  nous  avons  desia  dit  que  le  registre  ou  nous  sommes  enrollez,  est  nostre  Seigneur  Iesus  Christ,  a  parler  proprement.  Mais  tant  y  a  que  Dieu  se  reserve  la  cognoissance  de  nostre  election,  comme  feroit  un  Prince  le  premier  registre  et  l'original:  mais  il  nous  en  donne  des  copies  ou  instrumens  assez  authentiques,  quand  il  engrave  par  son  S.  Esprit  en  nos  coeurs,  que  nous  sommes  ses  enfans.  Yoila  donc  qui  nous  peut  certifier  de  nostre  election,  c'est  la  foy  que  nous  avons  en  Iesus  Christ,  Et  pourtant,  que  demandons-nous  plus?  Nous  avons  dit  que  Iesus  Christ  est  le  miroir  auquel  Dieu  nous  contemple  quand  il  nous  veut  avoir  agreables.