47:281  281  CAPUT  XII.  282  Lazari  resurrectione,  cuius  delendae  non  aliud  remedium  excogitare  potuit  impietas,  quam  ut  scelerata  et  exsecranda  caede  e  medio  tolleretur  homo  innoxius.  Caeterum,  quum  in  hoc  totus  sit  Satan  ut  penitus  obruat  vel  utcunque  obscuret  Dei  opera,  nostrum  est  ad  continuam  eorum  meditationem  sedulo  intentos  esse.  12.  Postridie  turba  multa.  Hunc  Christi  ingressum  reliqui  evangelistae  fusius  enarrant:  summam  tamen  omnium  hic  noster  complectitur.  Primo  autem  loco  tenendum  est  Christi  consilium,  nempe  quod  Hierosolymam  ultro  venit,  ut  se  morti  offerat.  Nam  mortem  eius  voluntariam  esse  oportuit,  quia  nonnisi  obedientiae  sacrificio  poterat  ira  Dei  erga  nos  placari.  Neque  enim  eum  latebat  eventus.  Priusquam  tamen  ad  crucem  trahatur,  solenni  ritu  vult  se  tanquam  regem  a  populo  excipi.  Imo  palam  declarat  se  regnum  suum  auspicari  ad  mortem  pergendo.  Etsi  autem  magna  populi  frequentia  celebratur  eius  adventus,  hostibus  tamen  ignotus  est,  donec  impletis  vaticiniis,  quae  postea  suo  loco  videbimus,  se  verum  esse  Messiam  comprobavit.  Nihil  enim  omittere  voluit,  quod  ad  solidam  fidei  nostrae  confirmationem  faceret.  Turba  multa,  quae  ad  festum  venerat.  Ergo  advenae  ad  praestandum  filio  Dei  pietatis  Officium  longe  promptiores  fuerunt  quam  cives  Hierosolymae,  quos  tamen  exemplo  esse  aliis  omnibus  decebat.  Nam  quotidie  habebant  sacrificia:  templum  semper  erat  in  conspectu,  quod  eorum  corda  ad  studium  quaerendi  Dei  accendere  debebat:  illic  erant  primarii  ecclesiae  doctores:  illic  lucis  divinae  sacrarium.  Nimis  ergo  foeda  eorum  ingratitudo,  quod  talibus  exercitiis  a  pueritia  imbuti  redemptorem  sibi  promissum  vel  respuunt,  vel  negligunt.  Sed  hoc  vitium  saeculis  fere  omnibus  commune  fuit,  ut  eo  audacius  Deum  homines  contemnant,  quo  propius  et  magis  familiariter  se  illis  offert.  In  aliis  autem,  qui  relictis  domibus  ad  diem  festum  celebrandum  convenerant,  multo  plus  fervoris  ut  sollicite  inquirant  de  Christo:  et  quum  venire  audiunt  in  urbem,  illi  obviam  gratulandi  causa  prodeunt.  Nec  vero  dubium  est,  quin  arcano  spiritus  instinctu  ad  eum  occursum  excitati  fuerint.  Hoc  prius  factum  fuisse  non  legimus.  Sed  quemadmodum  tubae  clangore  aut  voce  praeconis  subditos  suos  advocant  terreni  principes,  quum  imperii  sui  possessionem  adeunt,  ita  spiritus  sui  impulsu  Christus  populum  hunc  collegit,  a  quo  rex  salutaretur.  Quum  in  deserto  ipsum  turbae  creare  vellent  regem,  clam  se  in  montem  subduxit,  tunc  enim  aliud  regnum  animo  non  agitabant,  quam  sub  quo  bene  saginarentur  non  secus  ac  pecudes.  Stulto  igitur  ac  praepostero  eorum  voto  indulgere  et  obsequi  non  potuit  Christus,  quin  se  ipsum  abnegaret  munusque  abiiceret  a  patre  iniunctum;  At  nunc  regnum  sibi  asserit  quale  a