6:280  em  1)  usurpent.  Ac  ne  ad  populum  quidem  usurpare  prohibeo,  si  res  signata  bene  explicetur.  Verum  ubi  hoc  impetrari  nequit,  lectores  hic  moneo,  ut  ad  rem  magis  quam  ad  nomen  animadvertant.  Sed  quoniam  astute  Pighius  cum  necessitate  coactionem  [pag.  66]  perpetuo  confundit,  quarum  discrimen  tenere  et  diligenter  meminisse,  plurimum  ad  propositam  quaestionem  refert,  haec  quatuor  quid  inter  se  differant,  observare  convenit:  voluntatem  aut  liberam  esse,  aut  servam,  aut  spontaneam,  aut  coactam.  Liberam  voluntatem  vulgo  intelligunt,  et  sic  Pighius  quoque  definit,  quae  bonum  aut  malum  eligere  habeat  in  sua  potestate.  Coacta  voluntas  nulla  esse  potest,  quum  alterum  alteri  repugnet.  Verum  docendi  causa,  quid  significet,  dicendum  est,  ut  intelligatur  quid  sit  coactio.  Eam  ergo  sic  vocamus,  quae  non  sponte  sua,  nec  interiore  electionis  motu,  inclinatur  huc  vel  illuc,  sed  externo  motu  violenter  fertur.  Spontaneam  dicimus,  quae  ultro  se  flectit,  quocunque  ducitur,  non  autem  rapitur,  aut  trahitur  invita.  Serva  postremo  voluntas  est,  quae  propter  corruptionem  sub  malarum  cupiditatum  imperio  captiva  tenetur,  ut  nihil  quam  malum  eligere  possit,  etiam  si  id  sponte  et  libenter,  non  externo  motu  impulsa,  faciat.  Secundum  has  definitiones  homini  arbitrium  concedimus,  idque  spontaneum,  ut,  si  quid  mali  facit,  sibi  ac  voluntariae  suae  electioni  imputare  debeat.  Coactionem  et  violentiam  tollimus,  quia  pugnet  cum  natura  voluntatis,  nec  simul  consistat.  Liberum  autem  negamus,  quia  propter  ingenitam  homini  pravitatem  ad  malum  necessario  feratur,  nec  nisi  malum  appetere  queat.  Atque  hinc  colligere  licet,  quantum  sit  necessitatis  et  coactionis  discrimen.  Neque  enim  hominem  dicimus  invitum  trahi  ad  peccandum,  sed  quoniam  vitiosa  sit  eius  voluntas,  sub  peccati  iugo  teneri  captivam,  ideoque  necessario  male  velle.  Ubi  enim  servitus,  illic  necessitas.  Sed  plurimum  interest,  voluntariane  sit  servitus,  an  coacta.  Nos  autem  non  alibi  statuimus  peccandi  necessitatem  quam  in  vitio  voluntatis:  unde  spontaneam  esse  ipsam  sequitur.  Nunc  vides  spontaneum  et  necessarium  simul  convenire  posse,  quod  astu  tegere  conatur  Pighius  dum  liberum  hominem  [pag.  67]  in  eo  aestimat,  si  non  necessario  faciat,  aut  bene,  aut  male.  Quid  autem  Origenes?  Eos  pronunciat  haereticos,  qui  liberum  homini  arbitrium  auferunt.  Si  de  prima  naturae  conditione  loquitur,  nihil  affert,  quod  non  ipsi  quoque  profiteamur.  Si  inter  vitiatam  et  integram  naturam  non  distinguit,  nemo  est  piorum,  qui  non  fidei  principia  eum  confundere  pronunciet.  Negat  ita  nos  esse  necessitati  subiectos,  ut  omni  modo,  etiam  si  nolimus,  vel  bene  vel  male  1)  vocem  omittit  princeps.