55:280  quo  praediti  sunt  filii  Dei  in  suis  conscientiis,  illorum  temeritati  opponit.  In  hunc  modum  iactat  Paulus  (Gal.  6,  17)  se  ferre  Christi  stigmata,  et  catenis  suis  gloriatur  :  quum  tamen  satis  compertum  haberet  quale  de  illis  esset  mundi  iudicium.  Interea  subindicat  perperam  sentire,  et  cum  mundo  esse  excaecatos,  quibus  ignominia  carnis  gloriosa  non  est.  15.  Ne  quis  enim  vestrum.  Hic  quoque  obiectionem  praevenit.  Hortatus  erat  fideles  ad  tolerantiam,  si  contingeret  ipsos  ob  Christi  causam  affligi:  nunc  subiicit  cur  tantum  loquutus  sit  de  illo  afflictionum  genere:  quia  scilicet  abstinere  ab  omni  maleficio  debeant.  Itaque  hic  inclusa  est  altera  exhortatio,  ne  committant  ut  merito  videantur  plecti.  Itaque  particula  causalis  hic  supervacua  non  est,  quum  velit  apostolus  causam  reddere  cur  tantum  ad  societatem  passionum  Christi  hortatus  sit  fideles  :  et  simul  per  occasionem  eos  monere  ut  iuste  et  innoxie  vivant,  ne  iustas  sibi  poenas  accersant  propria  culpa.  Ac  si  diceret,  Christianorum  esse  de  omnibus  bene  mereri,  et  interea  male  ac  inhumaniter  tractari  a  mundo.  Si  quis  obiiciat,  neminem  adeo  insontem  posse  inveniri,  quin  tamen  ob  multa  delicta  flagellis  Dei  dignus  sit:  respondeo,  Petrum  hic  de  sceleribus  loqui,  a  quibus  nos  prorsus  alienos  esse  decet,  ut  sunt  furta,  et  homicidia:  deinde  respondeo,  Christianis  apostolum  praecipere  quales  esse  debeant.  Non  mirum  est  igitur,  si  discrimen  inter  eos  et  huius  mundi  filios  statuit,  qui  Dei  spiritu  destituti  ad  omne  flagitii  genus  se  prostituunt.  Filios  Dei  in  eadem  esse  causa  non  vult,  ut  iniuste  vivendo  iustas  legum  poenas  in  se  provocent.  Porro  alibi  iam  diximus,  utcunque  semper  in  electis  multa  sint  peccata,  quae  Deus  punire  iure  possit,  ipsum  tamen  pro  paterna  sua  indulgentia  filiis  suis  parcere,  ne  poenas  quas  meriti  sunt,  exigat:  interea  vero,  honoris  causa,  suis  et  Christi  sui  insignibus  eos  ornare,  dum  affligi  ob  evangelii  testimonium  patitur.  Nomen  aAXoTptoemaxoTtoc  videtur  mihi  alieni  cupidos  designare.  Nam  qui  ad  rapinas  vel  fraudes  inhiant,  limis  oculis  (ut  inquit  Horatius)  in  res  alienas  inquirunt.  Pecuniae  autem  contemptor  (ut  idem  alibi  loquitur)  auri  ingentes  oculo  irretorto  spectat  acervos.  16.  Si  autem  ut  Christianus.  Postquam  ab  omni  laesione  et  iniuria  Christianos  prohibuit,  ne  pariter  cum  incredulis  ob  sua  maleficia  mundo  sint  exosi:  nunc  Deo  iubet  gratias  agere  si  persequutiones  propter  Christi  nomen  sustineant.  Et  sane  hoc  non  vulgare  est  Dei  beneficium,  quod  nos  communibus  peccatorum  poenis  solutos  et  exemptos,  ad  honorificam  militiam  vocat,  ut  pro  evangelii  sui  testimonio,  vel  exsilia,  vel  carceres,  vel  probra,  vel  mortem  ipsam  subeamus.  Ergo  ingratos  Deo  esse  significat,  qui  in  persequutionibus  fremunt  vel  murmurant.