49:280  que  fruatur,  et  se  quoque  illis  exhibeat,  pro  officii  sui  ratione:  nam  sub  adventu  apostolorum  evangelii  quoque  accessio  continetur.  Quum  dicit,  ut  et  illuc  a  vobis  deducar:  eo  significat  quantum  sibi  promittat  de  ipsorum  benevolentia:  quod  esse  optimum  conciliandae  gratiae  genus,  antea  admonuimus.  Nam  quo  quisque  maiorem  sibi  fidem  haberi  audit,  eo  se  magis  obstrictum  putat:  quia  turpe  inhumanumque  ducimus,  opinionem  de  nobis  conceptam  fallere.  Quum  autem  subiungit,  si  tamen  expletus  ex  parte  fuero,  de  mutua  erga  eos  animi  sui  benevolentia  testatur,  de  qua  persuasos  esse  magnopere  intererat  evangelii.  25.  'Nunc  vero  proficiscor  Ierosolymam  ad  ministrandum  sanctis.  26.  Placuit  enim  Macedoniae  et  Achaiae  communicationem  facere  in  pauperes  sanctos,  qui  sunt  Ierosolymis.  21.  Placuit,  inquam,  et  debitores  sunt  ipsorum,  si  enim  spiritualibus  ipsorum  communicarunt  gentes,  debent  et  in  carnalibus  ministrare  ipsis.  28.  Hoc  igitur  quum  perfecero  et  obsignavero  illis  fructum  hunc,  proficiscar  per  vos  in  Hispaniam.  29.  Scio  autem  quod,  quum  venero  ad  vos,  in  plenitudine  benedictionis  evangelii  Christi  venturus  sim.  25.  Nunc  vero.  Ne  mox  adventum  suum  exspectent,  ac  sibi  data  verba  esse  putent  si  tardius  exspectatione  ipsorum  venerit,  praedicit  quid  negotii  habeat  in  praesentia,  quominus  profectionem  illam  suscipere  statim  possit:  se  enim  proficisci  Ierosolymam  ad  perferendas,  quae  ab  Achaia  et  Macedonia  collectae  erant,  eleemosynas.  Simul  tamen  sumpta  hinc  occasione  delabitur  ad  commendationem  istius  collationis,  quo  ipsos  quadam  insinuationis  specie  ad  imitationem  provocet.  Tametsi  enim  aperte  non  petit,  dum  tamen  Achaiam  et  Macedoniam  debuisse  id  facere  commemorat,  subindicat  quod  sit  Romanorum  officium,  qui  in  eadem  erant  causa.  Atque  eo  se  respexisse,  aperte  ad  Corinthios  fatetur:  Glorior,  inquit  (2.  Cor.  9,  2),  de  vestra  promptitudine  apud  omnes  ecclesias,  ut  vestro  exemplo  incitentur.  Fuit  autem  id  rarae  pietatis,  quod  quum  audirent  Graeci,  fratres  qui  Ierosolymis  erant  laborare  penuria:  non  considerarunt  quanto  locorum  intervallo  essent  a  se  disiuncti:  sed  sibi  satis  propinquos  ducentes  quibuscum  fidei  vinculo  cohaererent,  eorum  egestatem  abundantia  sua  sublevarunt,  Notandum  est  communicationis  nomen  quo  utitur:  optime  enim  exprimit  quo  affectu  fratrum  inopiae  succurrere  nos  deceat,  nempe  quia  propter  corporis  unitatem  communis  et  mutua  ratio  est.  Pronomen  xcva  non  reddidi,  quia  saepe  apud  Graecos  abundat  et  huius  loci  emphasim  minuere  videtur.  Ubi  vertimus  ad  ministrandum,  graece  est  participium  ministrans,  sed  illud  commodius  visum  est  ad  mentem  Pauli  exprimendam.  Se  enim  excusat  iusta  occupatione  teneri,  ne  statim  festinet  Bomam.