10.1:280  Caeterum  si,  dum  tibi  obsequutus  sum,  simul  etiam  curae  mihi  fuit,  sicuti  debebat,  Dei  cultus:  ideoque  vitam  meam  ad  praescriptum  verbi  eius  componere  studui,  pro  eius,  quam  mihi  patefecerat,  veritatis  notitia:  non  existimo,  Caesar,  id  fore  mihi  coram  [pag.  18]  tua  maiestate  crimini:  praesertim  quum  nihil  attentarim  adversus  tua  edicta,  sed  ita  perpetuo  vixerim,  ut  nullius  vel  scandali  vel  perniciosi  exempli  autor  unquam  fuerim.  Nam  quod  aiunt  evocasse  me  quendam  concionatorem,  eique  comites  dedisse,  in  eo  mihi  faciunt  iniuriam.  Neque  enim  unquam  sollicitavi,  vel  autor  fui,  vel  etiam  conscius  ut  veniret.  Sicut  nec  ullum  a  me  habuisse  comitatum,  palam  fiet.  Si  fecissem,  quae  ratio  esset  excusandi  facti  mei,  viderem:  sed  testis  est  mihi  Dominus,  nihili  esse  quod  iactatur:  ut  si  de  eo  penitus  inquirere  placeat,  tanto  clarior  futura  sit  mea  purgatio.  Quid  multis?  Quum  in  patria  essem,  Caesar,  eam  egi  vitam,  quae  nec  ullius  erga  te  vel  rebellionis,  vel  perfidiae,  nec  alicuius  erga  quempiam  iniuriae,  ullius  denique  criminis  notari  possit.  Imo  vero,  quum  tuo  beneficio  in  tua  aula  versarer:  iudicabas  vitam  meam  magis  esse  religiosi  alicuius  monachi,  quam  aulici.  Tantum  abest  ut  iudicari  possim,  impure  vel  dissolute  vixisse.  Caeterum  si  in  vulgari  caeremoniarum  observatione,  quae  hodie  abusu  nescio  quo  regnum  obtinent,  non  omnibus  satisfacere  potuerim:  causa  certe  non  est,  cur  ideo  condemner,  re  alioqui  tota  non  perspecta.  Quanquam  nil  unquam  [pag.  19]  innovarim,  vel  turbarim:  sed  ea  modestia  semper  conatus  sum  conscientiae  meae  respondere,  ut  interim  politiam  non  convellerem.  De  religione  mea  dicam  postea.  Sic  itaque  existimo,  toto  illo  vitae  meae  tempore  nil  fecisse,  quod  crimini  verti  posset,  vel  querimoniae  locum  dare  debeat.  Alterum  accusationis  meae  caput  est  de  meo  discessu:  in  quo  plane  me  purgare  non  possum,  Caesar,  quin  et  tuae  maiestati  repetam,  quod  alioqui  non  ignorat,  et  reliqua  commemorem,  quae  nondum  fortasse  intellexit.  Quum  uxorem  ducere  haberem  in  animo  (quanquam  eam  ex  familia  Brederodensi,  quae  tuae  est  ditionis  et  imperii,  delegissem:  nec  ingratum  esse  potest  tuae  maiestati  hoc  coniugium)  priusquam  tamen  hac  de  re  quidquam  statuerem,  an  id  tua  mihi  maiestas  permitteret,  sciscitatus  sum,  ut  qui  nil  plane  aggredi  vellem,  quod  non  prius  certus  essem  tibi  gratum  fore.  Contracto  matrimonio,  quod  aliquanto  tempore  vixerim  eo  quem  mihi  dederat  affinitas  loco:  id  opinor,  Caesar,  tua  maiestas,  aut  novum,  aut  insolens  non  iudicabit,  quum  et  valetudinis  meae  ratio  id  postularet.  Perpetuo  enim  morbo  detinebar.  Praeterea  erat  id  domicilium  ex  quo  uxorem  ducere  mihi  permiseras.  Eram  enim  apud  [pag.  20]  generosum  comitem  Guillermum  a  Neunard,  uxoris  meae  avun-