47:28  sam  quae  signatur,  nobis  praestari.  Non  tamen  intelligas,  spiritum  sub  columba  inclusum  fuisse,  qui  coelum  et  terram  implet,  sed  virtute  fuisse  praesentem,  ut  sciret  Ioannes,  non  frustra  oculis  suis  obiici  tale  spectaculum.  Quemadmodum  nos  Christi  corpus  scimus  non  alligatum  esse  pani,  sed  eius  tamen  participatione  fruimur.  Iam  quaeritur,  cur  sub  columbae  forma  spiritus  tunc  apparuerit.  Tenenda  semper  est  signorum  analogia  cum  veritate.  Quum  spiritus  apostolis  daretur,  visae  sunt  igneae  linguae  et  dissectae  (Actor.  2,  3),  quod  spargenda  esset  per  omnes  linguas  evangelii  praedicatio,  et  igneam  virtutem  habitura.  Sed  hoc  loco  Deus  repraesentare  palam  voluit  illam  Christi  mansuetudinem  quam  Iesaias  commendat:  Lignum  fumigans  non  exstinguet,  et  calamum  quassatum  non  confringet  (Ies.  42,  3).  Tunc  enim  primum  spiritus  super  eum  descendere  visus  est,  non  quod  prius  eo  vacuus  fuisset,  sed  quia  tunc  quasi  solemni  ritu  inauguratus  fuit.  Scimus  enim  instar  hominis  privati  per  triginta  annos  latuisse,  quia  nondum  manifestationis  tempus  advenerat.  Quum  vero  mundo  se  patefacere  vellet,  a  baptismo  incoepit.  Tunc  ergo  non  tam  sibi,  quam  suis  accepit  spiritum:  atque  ideo  visibilis  fuit  descensus  ille,  ut  sciamus  in  eo  residere  donorum  omnium  copiam,  quorum  inopes  et  vacui  sumus.  Idque  ex  verbis  Baptistae  colligere  promptum  est:  quum  enim  dicit,  Super  quem  videris  spiritum  descendentem,  ac  manentem  super  eum,  is  est  qui  baptizat  spiritu,  perinde  valet  ac  si  diceret,  in  hunc  finem  spiritum  conspectum  esse  sub  forma  visibili,  et  requievisse  super  Christum,  ut  sua  plenitudine  omnes  suos  irrigaret.  Quid  sit  baptizare  spiritu,  supra  breviter  attigi:  nempe  suum  baptismo  effectum  dare,  ne  inanis  sit  vel  irritus,  quod  spiritus  sui  virtute  praestat.  33.  Super  quem  videris.  Hic  nascitur  difficilis  quaestio.  Nam  si  Ioannes  Christum  non  noverat,  cur  recusat  ad  baptismum  admittere?  Hoc  certe  ignoto  non  diceret:  Ego  abs  te  potius  debeo  baptizari  (Matth.  3,  14).  Respondent  quidem  eatenus  fuisse  cognitum,  quod  tanquam  eximium  prophetam  reverebatur,  Dei  filium  esse  nesciebat.  Atque  frigida  est  haec  solutio,  debet  enim  quisque  absque  ullius  personae  respectu  vocationi  Dei  parere.  Itaque  nulla  est  hominis  dignitas  vel  excellentia,  quae  nos  in  officio  nostro  impedire  debeat.  Quare  Deo  eiusque  baptismo  fecisset  iniuriam  Ioannes,  si  alteri  cuivis,  praeterquam  Dei  filio  sic  loquutus  esset.  Ergo  necesse  est  Christum  prius  fuisse  cognitum.  Primo  notandum  est,  hic  de  notitia  agi  quae  ex  consuetudine  et  mutuo  usu  gignitur.  Tametsi  ergo  Christum  agnoscit  ex  quo  videt,  non  tamen  desinit  hoc  verum  esse,  non  fuisse  sibi  invicem  notos  communi  hominum  more,  quia  notitiae  initium  ex  Deo  profectum  est.  Nondum  tamen  prorsus  soluta  vide-