42:28  voquer  Dieu  aussi  bien  qu'en  Iudee,  or  cettui-ci  anticipe  le  temps,  voila  desia  une  trahison,  quand  il  pervertist  ainsi  la  parole  de  Dieu.  Or  il  y  avoit  aussi  une  autre  faucete  seconde,  car  le  prophete  Isaye  en  parlant  d'un  autel  qui  seroit  dresse,  n'entend  pas  un  autel  materiel,  mais  il  signifie  simplement  que  Dieu  seroit  adore  en  Egypte,  comme  il  avoit  este  en  Iudee,  et  c'est  une  facon  de  parler,  commune  aux  prophetes,  ce  que  nous  devons  bien  noter,  car  cet  Onias  duquel  parle  ici  le  prophete  Daniel,  qu'il  appele  transgresseur,  avoit  un  argument  tout  semblable  a  celuy  qu'ont  auiourd'huy  les  papistes,  car  quand  les  papistes  nous  veulent  approuver  leur  messe,  ils  alleguent  ce  qui  est  dit  au  prophete  Malachie,  Qu'on  fera  oblation  pure  a  Dieu,  depuis  Orient  iusqu'en  Occident.  Quand  Dieu  parle  ainsi,  il  n'entend  pas  qu'on  face  des  sacrifices  visibles,  comme  on  avoit  fait  du  temps  de  la  loy.  Quoy  donc?  Simplement  il  entend  qu'il  sera  adore,  et  que  chacun  le  connoistra  Dieu,  que  chacun  luy  servira  depuis  un  bout  du  monde  iusqu'a  l'autre:  voila  l'intention  principale  du  prophete.  Or  les  papistes  selon  qu'ils  sont  brutaux  alleguent,  O  il  faut  donc  qu'il  y  ait  des  sacrifices,  car  encores  le  prophete  nomme  un  sacrifice  par  especial,  que  comme  il  y  ha  ea  des  sacrifices  en  la  loy,  et  de  veaux,  et  de  boeufs,  et  de  moutons,  il  faut  qu'il  y  en  ait  aussi  auiourd'huy,  or  les  sacrifices  ne  se  doivent  plus  faire  de  bestes  brutes,  il  s'ensuit  donc  qu'il  y  ha  un  sacrifice,  qui  n'avoit  point  este  en  usage:  or  au  contraire  nous  disons  que  nous  sommes  les  sacrifices  que  Dieu  demande,  quand  chacun  de  nous  s'offre  et  se  dedie  a  luy,  voila  un  sacrifice  raisonnable,  ainsi  que  Sainct  Paul  en  traitte  au  douzieme  des  Romains,  et  non  sans  cause,  il  dit  un  sacrifice  raisonnable,  car  il  signifie  que  c'est  celuy  que  Dieu  accepte,  quand  un  chacun  chrestien  est  mortifie  en  soy,  et  qu'il  se  presente  la  comme  en  sacrifice,  pour  renoncer  du  tout  a  soy,  et  puis  nos  oraisons  que  nous  faisons,  ce  sont  les  veaux  des  levres,  (comme  il  en  est  traitte  en  l'Epitre  aux  Hebrieux),  les  aumosnes  et  tout  ce  que  nous  faisons  a  nos  prochains,  ce  sont  autant  de  sacrifices  (comme  sainct  Paul  en  parle  en  un  autre  lieu),  On  pourroit  bien  donc  respondre  cela  aux  papistes  simplement,  pour  les  redarguer  en  leurs  superstitions,  et  en  leur  sottise,  quand  ils  traittent  ainsi  lourdement  l'escriture  saincte,  mais  encores  i'ay  desia  touche  que  leur  argument  est  du  tout  semblable  a  celuy  d'Onias,  car  les  prophetes  quand  ils  ont  parle  d'autels,  et  de  sacrifices,  ils  ont  eu  regard  a  leur  temps,  pour  s'accommoder  a  la  simplesse  du  peuple,  d'autant  qu'il  n'y  avoit  point  d'autre  facon  de  servir  et  adorer  Dieu,  sinon  par  sacrifices,  quand  on  vouloit  faire  confession  de  ses  peches,  on  venoit  sacrifier  au  temple,  quand  on  vouloit  faire  confession