41:28  constantia:  sed  quoniam  intrepide  mortem  oppetere  voluit  pro  cultu  Dei  sui,  et  potuit  se  ipsum  abnegare,  et  renuntiare  mundo  :  haec  est  vera  et  seria  probatio  fidei  et  constantiae  eius.  Credidit  igitur  Deo,  non  quod  tale  miraculum  speraverit:  sed  quia  scivit  se  beatum  fore,  si  perstaret  in  puro  Dei  cultu:  Quemadmodum  dicit  Paulus  (Phil.  1,  21),  Christus  mihi  lucrum  est  vivendo  et  moriendo.  Daniel  ergo  recubuit  in  auxilium  Dei:  sed  clausit  oculos  ad  ipsum  eventum,  neque  anxius  fuit  supra  modum  de  vita  sua:  sed  quoniam  animus  eius  erectus  erat  ad  spem  melioris  vitae,  ideo  etiamsi  centies  fuisset  moriendum,  tamen  non  desiisset  credere:  quia  fiducia  nostra  extenditur  ultra  fines  huius  caducae  et  corruptibilis  vitae,  quemadmodum  satis  notum  est  omnibus  piis.  Postea  sequitur  quod  iam  attigi,  24.  Et  iussit  rex,  et  adduxerunt  viros  illos  qui  instruxerant  (erexerant,  clamaverant)  accusationem  (qui  avoient  dresse  ceste  calomnie)  adversus  eum,  nempe  Danielem:  et  in  foveam  (speluncam)  leonum  proiecti  sunt  ipsi,  liberi  ipsorum,  et  uxores  eorum,  et  nondum  pervenerant  ad  fundum  (vel,  pavimentum)  speluncae,  quando  dominati  sunt  (hoc  est,  praevaluerunt)  in  eos  leones,  et  omnia  ossa  eorum  fregerunt.  Hac  circumstantia  clarius  enituit  Dei  virtus  in  servando  Daniele,  quod  statim  discerpti  sunt  a  leonibus  qui  ipsum  sceleste  accusaverant.  Si  quis  enim  dicat  saturos  fuisse  leones,  vel  aliud  fuisse  causae  cur  non  fuerit  discerptus  Daniel,  cur  eo  extracto  statim  tanta  rabies  expellat  belluas  illas,  ut  lacerent  atque  devorent  non  unum  hominem,  sed  magnam  turbam?  Ex  multis  proceribus  nemo  salvus  evadit:  deinde  accedunt  eorum  uxores,  accedunt  etiam  liberi:  vix  leones  poterant  sufficere  ad  tantam  lanienam,  et  tamen  ad  minimum  usque  omnes  pereunt:  unus  Daniel  quomodo  evasit?  Videmus  certe  ut  Deus  hac  comparatione  voluerit  testatam  reddere  suam  virtutem,  ne  quis  obiiceret  Danielem  fuisse  relictum  a  leonibus,  quoniam  iam  essent  saturi,  neque  praedam  appeterent.  Contenti  enim  fuissent  vel  tribus,  vel  quatuor  hominibus.  Atqui  devorant  et  viros,  et  mulieres,  et  pueros.  Hinc  ergo  patet  ora  leonum  fuisse  fraenata  divinitus,  quum  tota  nocte  fuerit  salvus  Daniel,  illi  autem  statim  perierint  simul  ac  proiecti  sunt  in  speluncam  :  quia  rursus  videmus  impulsas  fuisse  belluas  ad  subitam  rabiem,  ut  non  exspectarent  donec  pervenirent  ad  fundum,  sed  in  itinere  ipso  discerperent.  Reliqua  differemus  in  crastinum.  Finis  hesternae  lectionis  fuit,  hostes  Danielis,  qui  maligne,  per  invidiam,  et  crudeliter  eum  detulerant,  simul  ac  proiecti  sunt  in  speluncam  leonum,  fuisse  laniatos  una  cum  uxoribus  et  liberis:  unde