39:28  32.  Super  omne  malum  (vel,  propter  omne  malum)  filiorum  Israel,  et  filiorum  Iehudah,  quod  patrarunt  ad  provocandum  me,  ipsi,  reges  eorum,  proceres  eorum,  sacerdotes  et  prophetae  eorum,  et  vir  Iehudah,  et  incolae  Ierusalem.  Pendet  hic  versus  ex  proximo.  Conquestus  fuerat  Deus  urbem  fuisse  tam  perverso  ingenio  ut  videri  posset  in  hoc  fundata  et  exstructa,  ut  peccando  accerseret  sibi  exitium:  confirmat  sententiam  illam  quum  addit,  propter  omne  scelus  filiorum  Israel,  et  filiorum  Iehudah.  Per  omne  scelus  intelligit  quod  ante  dixerat,  tantummodo  ipsos  fuisse  patrantes  malum,  quia  non  tantum  in  parte  una  deliquerant,  sed  sese  prostituerant  ad  impietatem,  ut  nihil  esset  in  ipsis  purum  vel  sincerum.  Addixerant  enim  se  impietati,  ut  nihil  omitterent  quod  faceret  ad  iram  Dei  provocandam.  Extenditur  enim  universalis  nota  ad  singulas  vitae  partes:  quasi  diceret  tanta  malitia  fuisse  imbutos,  ut  nihil  in  ipsis  sanum  restaret.  Fieri  potest  ut  corpus  laboret  uno  aut  altero  morbo:  sed  erit  tamen  sanitas  in  quibusdam  membris.  At  vero  propheta  intelligit  Israelitas  sic  computruisse  quemadmodum  etiam  Psalmus  14  loquitur,  ut  nihil  prorsus  integrum  apud  ipsos  maneret.  Iam  hic  Deus  omnes  ordines  accusat.  Dicit  enim  reges  primo  loco  peccasse,  quia  non  tantum  deseruerint  ipsi  verum  Dei  cultu,  sed  aliis  autores  fuerint  defectionis,  vel  apostasiae.  Regibus  subnectit  proceres,  vel  consiliarios  :  postea  addit  sacerdotes  et  prophetas.  Et  certe  debuerant  reges  cum  suis  consiliariis  esse  quasi  alter  oculus,  sacerdotes  autem  et  prophetae  alter.  Duo  enim  oculi  in  vera  et  legitima  gubernatione  sunt  iudices  et  pastores  ecclesiae.  Propheta  autem  dicit  reges  et  consiliarios  fuisse  impios:  deinde  societate  criminis  implicitos  fuisse  sacerdotes  et  prophetas.  Hoc  autem  instar  prodigii  fuit,  videre  caecitatem  illam  et  amentiam  in  sacerdotibus,  quos  Deus  haereditario  iure  praefecerat  ecclesiae  suae  quasi  legis  suae  interpretes,  quemadmodum  dicitur  (Malac.  2,  7),  Labia  sacerdotis  custodient  scientiam,  et  legem  requirent  ex  ore  eius,  quia  nuntius  vel  legatus  Dei  exercituum  est.  Quum  autem  sacerdotes  in  officio  cessarent  vel  inscitia,  vel  ignavia,  Deus  substituit  prophetas  in  eorum  locum,  et  hoc  quasi  adminiculo  fulcire  voluit  ecclesiae  suae  ruinam.  Atqui  Ieremias  dicit  prophetas  quoque  similes  fuisse  sacerdotibus.  Notandus  est  diligenter  hic  locus,  quia  videmus  quas  sibi  delitias  multi  faciant,  dum  ecclesia  turbatur  dissidiis.  Putant  enim  hoc  modo  se  excusari,  si  abiiciant  omnem  curam  et  studium  pietatis:  et  multi  sibi  indulgent  in  hac  mollitie.  Quod  si  ita  teneri  fuissent  fideles  illo  tempore,  annon  millies  evanuisset  religio,  exstincta  prorsus  fuisset  atque  abolita  ex  ipsorum  cordibus?  Discamus  ergo  etiamsi  surgant  pseudoprophetae  et