38:28  vertunt,  invaluerunt,  sed  non  pro  veritate:  alii,  Neque  ad  veritatem,  vel  pro  veritate  invaluerunt.  Sed  ego  existimo  alium  esse  prophetae  sensum,  quod  scilicet  oppressa  veritate  plus  licentiae  sibi  sumpserint:  quasi  diceret  egisse  suos  triumphos,  quum  abolita  esset  omnis  fides  et  rectitudo.  Nam  sub  nomine  ruiUN  haud  dubie  complectitur  propheta  fidem,  qua  inter  se  contrahere  debent  homines.  Quum  ergo  nulla  esset  apud  eos  integritas,  dicit  eos  grassatos  fuisse  quasi  victores,  quum  pedibus  calcarent  omnem  rectitudinem.  Hoc  autem  signum  est  extremae  impietatis,  dum  homines  quidvis  sibi  permittunt,  postquam  prostraverunt  fidem  et  aequitatem.  Alii  sic  exponunt,  dominatos  fuisse,  sed  non  propter  fidem,  aut  propter  virtutes,  quia  scilicet  obrepserant,  vel  penetraverant  ad  honores  malis  artibus  et  perversis.  Et  certe  propheta  stylum  dirigit  non  contra  homines  gregarios,  sed  contra  ipsos  proceres,  qui  dominationem  illam  occupaverant  fraudibus.  Sed  contentus  sum  illo  sensu,  quem  attuli,  nempe,  quod  invaluerint,  quia  nulla  erat  veritas:  quemadmodum  si  dicamus  regnare  caecos  in  tenebris,  ubi  nullum  est  discrimen.  Summa  est,  non  tantum  addictos  fuisse  sceleribus,  sed  triumphasse  de  fide  et  iustitia,  quum  sibi  quidvis  licentiae  permitterent,  quia  scilicet  nemo  audebat  verbum  facere  ad  ipsos  cohibendos.  Dicit  in  tota  terra  sic  invaluisse,  quoniam  exprimit  hic  deploratum  statum  populi:  quasi  diceret,  nullam  esse  residuam  spem  salutis,  quoniam  ubique  oppressa  sit  veritas  et  fides.  Sequitur  explicatio,  quod  scilicet  a  malo  ad  malum  egrediantur,  hoc  est,  obstinate  pergant  in  suis  maleficiis.  Nam  exire  tantundem  valet  atque  transire.  Transeunt  igitur  a  malo  usque  ad  malum,  hoc  est,  si  crimen  aliquod  patrarunt,  nulla  poenitentia  subit  eorum  animos,  ut  retro  se  flectant:  sed  continuant  sua  scelera,  et  mala  malis  accumulant.  Nunc  ergo  tenemus  quid  sibi  velit  propheta.  Designat  enim  pertinaciam  in  maleficiis,  et  simul  ostendit  nullum  esse  signum  correctionis,  quoniam  transitum  sibi  faciant  ab  uno  perverso  actu  ad  alium  similem.  Et  me  non  cognoscunt,  dicit  Iehovah.  Hic  fontem  omnium  malorum  ostendit,  quod  scilicet  reiecerint  omnem  Dei  notitiam  et  sensum.  Scimus  enim  ubi  serio  cognoscitur  Deus,  fieri  non  posse  quin  simul  animos  uostros  afficiat  eius  timor:  et  Dei  cognitio  semper  parit  reverentiam  et  pietatis  studium.  Verum  quidem  est,  ab  impiis  etiam  et  reprobis  Deum  aliquatenus  cognosci.  Nam  de  ipso  aliquid  imaginantur:  sed  illa  est  evanida  cognitio.  Caeterum  ubi  hoc  nobis  persuasum  est,  Deum  esse  mundi  iudicem,  et  accedit  etiam  cognitio  bonitatis  et  paternae  gratiae,  fieri  non  potest  quin  illum  et  timeamus  et  sponte  ac  libenter  colamus.  Ergo  ignoratio  Dei  est  tanquam  amentia  quaedam,  quae  homines  abripit  ad  quodvis  impietatis  genus.  Hac  ratione  28