37:28  enim  distinguitur  ab  omnibus  idolis,  quae  temporalia  sunt,  et  conficta  ab  hominibus:  quod  profecto  si  animis  nostris  vere  insideret,  non  esset  amplius  diffidentiae  locus.  Nam  si  aeternus  est  Deus,  nunquam  mutatur  aut  labascit.  Hoc  enim  coniunctum  aeternitas  habet,  ut  nunquam  sit  mutationi  obnoxia,  sed  perpetuo  sibi  constet.  Quae  quum  non  satis  tenerent  Iudaei,  quamvis  saepius  audiissent:  ideo  propheta  hac  obiurgatione  ipsos  excitare  voluit,  ut  ostendat  bis  reos  fore  coram  Deo,  qui  edocti  tam  plurimis  eius  beneficiis  quam  verbo  honorem  tamen  quem  decet  et  gloriam  ei  non  tribuant.  {Non  fatigatur.)  Duo  hic  docet  propheta:  primum,  non  fatigari  Deum  benefaciendo:  deinde,  sapientiam  eius  a  nemine  pervestigari.  Priore  membro  ostendit  nihil  obstaturum  Deo  quominus  beneficentiam  suam  prosequatur:  quia  similis  non  est  hominibus,  quorum  exhauriuntur  facultates  saepius  largiendo,  aut  qui  nova  subinde  officia  praestando  fatigantur,  aut  quos  suae  liberalitatis  poenitet.  Inexhausta  enim  est  ipsius  beneficentia:  si  patribus  liberalis  fuit,  posteros  non  minore  liberalitate  et  munificentia  prosequetur.  Quod  autem  saepenumero  aliter  agit  Deus  quam  nobis  expedire  putemus,  occurrit  propheta,  et  consilium  eius  incomprehensibile  esse  dicens,  admonet  minime  esse  murmurandum,  quamvis  non  statim  votis  nostris  obtemperet:  quia  nihil  ad  spem  nostram  fovendam  aptius  quam  haec  sobrietas,  ubi  reputantes  quam  mirabiliter  operetur  Deus  in  suis  servandis,  arcano  eius  consilio  nos  subiicimus.  29.  {Dans  lasso.)  Nunc  accommodat  propheta  generales  sententias  quibus  usus  est  ad  praesentem  causam.  Hoc  enim  ipsius  consilium  esse  diximus,  ut  populum  melius  animet,  atque  in  spem  erigat.  Quod  autem  Iudaei  tunc  fracti  erant  viribus,  omnique  robore  destituti,  ideo  admonet  officium  Dei  esse,  iis  qui  hoc  modo  fessi  sunt  ac  debilitati  opem  ferre.  Commendat  igitur  potentiam  Dei  hac  circumstantia,  ut  colligant  vel  statuant  non  esse  dubitandum  de  salute  quamdiu  ipsum  propitium  habuerint.  Propheta  quidem  populum  respexit,  qui  captivus  in  Babylone  tenebatur:  sed  nobis  quoque  hanc  doctrinam  accommodare  debemus,  ut  quoties  nos  deficient  vires,  ac  prostrati  fere  iacebimus,  hoc  veniat  in  mentem:  Dominum  lassis  manum  porrigere,  qui  omni  ope  destituti  deficiunt.  Sed  prius  lassitudinem  nostram  et  inopiam  a  nobis  sentiri  necesse  est,  ut  impleatur  illud  Pauli,  Virtus  Dei  in  infirmitate  nostra  perficitur  (2.  Cor.  12,  9).  Nisi  enim  serio  in  animis  nostris  perculsi  et  convicti  simus  nostrae  infirmitatis,  auxilium  a  Deo  opportunum  habere  non  possumus.  30  et  31.  {Fatigantur  adolescentes.)  Hac  comparatione  magis  illustrat  propheta  quod  ante  dixerat  :