35:28  pour  donner  sentence  d'une  chose  qui  nous  est  cachee,  et  de  laquelle  nous  ne  sommes  pas  deuement  informez.  IL  est  vrai  que  ceste  lecon  appartient  sur  tout  a  ceux  qui  sont  constituez  en  estat  de  iustice.  Ils  doivent  bien  s'enquerir  d'un  fait,  devant  qu'en  iuger:  mais  si  est-ce  que  chacun  en  son  endroit  doit  observer  ceste  regle.  Voila  donc  le  premier  que  nous  avons  ici  a  noter,  suivant  ce  qui  fut  hier  declare:  et  tousiours  nous  voyons  ce  qui  fut  dit,  c'est  assavoir  que  l'Esprit  de  Dieu  quand  il  gouverne  un  homme,  tout  ainsi  qu'il  lui  donne  zele,  et  l'esmeut  quant  a  la  religion,  aussi  il  lui  donne  prudence  et  discretion:  tellement  que  l'un  ne  va  iamais  sans  l'autre,  et  si  un  homme  n'a  un  zele  regle,  il  ne  peut  pas  s'attribuer  nulle  vertu:  et  si  l'Esprit  de  Dieu  domine  en  lui,  il  cognoistra  que  ces  choses  sont  inseparables.  Et  d'autant  plus  avons  nous  a  prier  Dieu,  que  s'il  nous  fait  grace  de  maintenir  sa  verite:  il  nous  monstre  aussi  quand  il  sera  temps  de  parler,  ou  de  nous  taire,  et  qu'il  nous  donne  intelligence  et  raison,  afin  que  nous  n'allions  point  a  la  volee  par  inconsideration:  car  l'excuse  est  trop  maigre  quand  nous  dirons,  Ie  cuidoye  bien  faire,  i'avoye  entendu  la  chose  estre  telle.  Il  est  vrai  qu'il  n'y  a  celui  qui  ne  faille  :  mais  d'autant  plus  devons-nous  estre  sur  nos  gardes:  et  voyans  l'infirmite  de  nostre  esprit,  que  nous  cerchions  d'estre  gouvernez  de  Dieu  et  par  sa  main,  tellement  qu'en  ayant  bon  zele  nous  ayons  aussi  la  raison  pour  le  bien  moderer  et  regir.  Venons  maintenant  a  ce  que  dit  Eliu.  Il  monstre  que  sa  dispute  ne  sera  pas  telle  que  celle  des  autres,  Ne  dites  point,  Nous  avons  trouve  sagesse:  car  Dieu  a  renverse  Iob,  et  non  point  les  hommes.  Ici  Eliu  signifie  qu'il  aura  un  autre  moyen  pour  disputer  contre  Iob,  que  n'ont  pas  eu  les  autres.  Car  quel  moyen  ont-ils  tenu?  Tu  es  afflige  de  la  main  de^  Dieu,  et  non  point  sans  cause:  il