31:28  usant  d'une  semblable  remonstrance  et  protestation  qu'avoit  fait  Farel  au  paravant,  me  rappela  a  une  autre  place.  Estant  doncques  espovante  par  l'exemple  de  Ionas,  lequel  il  me  proposoit,  ie  poursuyvi  encore  en  la  charge  d'enseigner.  Et  mesme  combien  que  touiours  ie  continuasse  a  estre  semblable  a  moimesme,  c'est  a  scavoir  de  ne  vouloir  point  apparoistre  ou  suyvre  les  grandes  assemblees,  ie  ne  scay  comment  toutesfois  on  me  mena  comme  par  force  aux  iournees  Imperiales,  ou  bon-gre  mal-gre  il  me  falut  trouver  en  la  compagnie  de  beaucoup  de  gens.  Depuis,  quand  le  Seigneur  ayant  pitie  de  ceste  ville,  eut  appaise  les  esmotions  et  troubles  pernicieux  qui  y  estoyent,  et  par  sa  vertu  admirable  dissipe  tant  les  mal-heureux  conseils,  que  les  efforts  sanguinaires  des  perturbateurs  de  la  Republique,  contre  mon  desir  et  affection  la  necessite  me  fut  imposee  de  retourner  a  ma  premiere  charge.  Car  combien  que  le  salut  de  ceste  Eglise  me  fust  en  telle  recommandation,  que  pour  icelle  ie  n'eusse  point  fait  de  difficulte  d'abandonner  ma  vie,  ma  timidite  toutesfois  me  presentoit  beaucoup  de  raisons  de  m'excuser,  pour  ne  point  reprendre  derechef  sur  mes  espaules  un  fardeau  si  pesant.  Mais  a  la  parfin  le  regard  de  mon  devoir,  que  ie  consideroye  avec  reverence  et  conscience,  me  gaigna,  et  feit  condescendre  a  retourner  vers  le  troupeau  d'avec  lequel  i'avoye  este  comme  arrache:  ce  que  ie  feis  avec  tristesse,  larmes,  grande  sollicitude  et  destresse,  comme  le  Seigneur  m'en  est  tres-bon  tesmoin,  et  plusieurs  bons  personnages,  qui  m'eussent  bien  voulu  veoir  hors  de  ceste  peine,  n'eust  este  que  ce  que  ie  craignoye;  et  qui  m'avoit  fait  consentir,  les  retenoit  aussi  et  leur  fermoit  la  bouche.  Maintenant  si  ie  vouloye  reciter  les  divers  combats  par  lesquels  le  Seigneur  m'a  exerce  depuis  ce  temps-la,  et  par  quelles  espreuves  il  m'a  examine,  ce  seroit  une  longue  histoire.  Mais  afin  que  ie  n'ennuye  point  de  paroles  inutiles  les  lecteurs,  il  me  suffira  de  reiterer  en  brief  ce  que  i'ay  touche  un  peu  devant,  qu'en  considerant  tout  le  discours  de  la  vie  de  David,  il  me  sembloit  qu'a  chacun  pas  il  me  monstroit  le  chemin,  et  que  cela  m'a  este  un  merveilleux  soulageuent.  Car  comme  ce  sainct  Roy  a  este  fasche  de  guerres  continuelles  par  les  Philisthius  et  autres  peuples  estranges  ses  ennemis,  mais  encore  navre  plus  grievement  au  milieu  de  son  peuple  par  la  malice  d'aucuns  desloyaux  et  malheureux:  ainsi  ie  puis  dire  quant  a  moy,  que  de  tous  costez  i'ay  este  assailli,  tellement  qu'a  grand'  peine  ay-ie  peu  estre  en  repos  un  bien  peu  de  temps,  que  touiours  ie  n'eusse  a  soustenir  quelque  combat,  ou  de  ceux  de  dehors,  ou  de  ceux  de  dedans.  Satan  a  souventesfois  tasche  par  ses  menees  de  renverser  l'estat  de  ceste  Eglise:  mais  la  chose  une  fois  veint  iusques  la,  que  tout  foible  et  craintif  que  ie  suis,