30:28  erimus  fanaticis  illis  hominibus  suas  blasphemias  plenis  buccis  despumantibus,  et  adversus  hanc  doctrinam  frementibus,  quod  illam  sensibus  suis  et  mentis  viribus  capere  non  possint.  Sane  nostris  sensibus  Dei  voluntas  quidem  varia  et  sibi  contraria  videtur:  quemadmodum  et  Paulus  Dei  sapientiam  vocat  multiformem,  unde  fit  ut  ad  illam  caecutiamus,  et  ad  illam  viarum  Domini  abyssum  immensam  stupeamus  :  verumtamen  Dei  nihilominus  voluntas  una  et  simplex  est.  Et  quod  iam  nostri  sensus  assequi  non  possunt,  videbimus  quum  in  ipsius  gloriam  transformari  fuerimus,  et  Deum  sicuti  est  videbimus.  Nunc  enim  tanquam  ex  parte  cognoscimus  et  in  obscuritate:  quapropter  necesse  est  nos  exspectare  diem  plenae  revelationis,  in  quo  comprehendamus  quae  iam  infinitis  partibus  omnes  nostros  sensus  superant  et  occulta  sunt.  Sic  enim  Deus  ista  disposuit.  Et  hactenus  de  proposita  illa  quaestione,  quomodo  mansurum  fuisse  et  stabiliendum  dicatur  regnum  in  manu  et  familia  Saulis,  si  Dei  verbo  se  obsequentem  praestitisset.  Deus  enim  labi  illum  voluit,  ut  Davidem  in  regiam  dignitatem  eveheret,  et  in  regni  possessionem  mitteret.  Idcirco  dicitur  Deus  hominem  secundum  cor  suum  reperisse:  quibus  verbis  Samuel  ostendit  merito  Saulem  fuisse  reiectum.  Neque  enim  aeternum  illud  decretum  respicit,  quo  Deus  per  prophetam  suum  praedixit  sceptrum  a  tribu  Iuda  nunquam  recessurum.  Sed  hominem  se  dicit  reperisse  secundum  animum  suum,  quod  Saul  sua  culpa  exauctoratus  sit:  quod  a  Deo  propter  peccatum  non  esset  approbatus,  sed  reiectus.  Atque  hanc  ob  causam  regnum  ipsius  non  fuit  diuturnum.  Caeterum  verissimum  est  Davidem  gravissime  in  multis  Deum  offendisse:  et  quidem  longe  gravius  quam  Saul  in  hoc  facto.  Neque  enim  aut  terrore  perculsus,  aut  alio  vehementiore  metu  adactus  est  ad  Uriam  interficiendum,  aut  ad  Dei  nomen  quantum  in  ipso  fuit,  blasphemis  impiorum  vocibus  et  lacerationibus  exponendum,  aut  ad  tam  turpe  et  foedum  adulterium  committendum.  Quibus  vitiis  longe  gravius  coram  Deo  peccavit.  Sed  Deo  ipsi  peccata  illa  condonare  visum  est,  et  ex  mera  sua  gratia  quod  semel  decreverat  apud  se  voluit  ad  finem  suum  perducere,  regnumque  in  tribu  Iuda  et  Davidis  familia  erigere  et  confirmare,  donec  adveniret  ille  rex  regum  Dominus  noster  Iesus  Christus.  Atque  haec  est  vis  verborum  illorum,  Iehovam  quaesivisse  sibi  virum  secundum  animum  suum.  Caeterum  non  inde  tamen  sequitur  Davidem  aliquid  ante  hoc  Domini  decretum  boni  fecisse  aut  cogitasse,  quo  Dominum  commoveret,  ut  deinceps  videbimus.  Sed  Deus  ilium  elegerat  et  ad  hunc  usum,  licet  incogitautem,  destinarat.  Ita  Dominum  videmus  Ieremiam  prophetam  compellare,  antequam  ex  utero  matris  egressus  esses,  ego  te  ad  hanc  vocationem