3:28  sons,  et  deserts,  et  cavernes1)  me  sont  plus  seurs  et  de  meilleure  fiance.  Car  les  Prophetes  y  estans  cachez,  ont  prophetizé.2)  Or  qu'est-ce  que  le  monde  honore  auiourdhuy  en  ces  Evesques  cornuz,  sinon  qu'il  repute  pour3)  plus  excellens  ceux  qui  president  aux  plus  grandes  villes?  Ostons  donc  une  si  folle  estime:  au  contraire  permettons  cela  au  Seigneur,  que  puis  qu'il  est  seul  cognoissant  qui  sont  les  siens  (2  Tim.  2,  19),  qu'aussi  aucunesfois  il  puisse  oster  la  cognoissance  exterieure  de  son  Eglise,  de  la  veue  des  hommes.  Ie  confesse  bien  que  c'est  une  horrible  vengeance  de  Dieu  sur  la  terre:  mais  si  l'impieté  des  hommes  le  merite  ainsi,  pourquoy  nous  efforçons-nous  de  contredire  à  la  iustice  divine?  En  telles  manieres  le  Seigneur,  quelques  aages  par  cy  devant,  a  puny  l'ingratitude  des  hommes.  Car  pourtant  qu'ils  n'avoyent  voulu  obeir  à  sa  verité,  et  avoyent  esteint  sa  lumiere,  il  a  permis  qu'estans  aveuglez  en  leur  sens,4)  ils  fussent  abusez  de  lourdes5)  mensonges,  et  enseveliz  en  profondes  tenebres:  tellement  qu'il  n'apparoissoit  nulle  forme  de  vraye  Eglise.  Cependant  neantmoins  il  a  conservé  les  siens  au  milieu  de  ces  erreurs  et  tenebres,  comment  qu'ils  fussent  espars  et  cachez.  Et  n'est  pas  de  merveilles:  car  il  a  apprins  de  les  garder  et  en  la  confusion  de  Babylone,  et  en  la  flambe  de  la  fournaise  ardente.  En  ce  qu'ils  veulent  la  forme  de  l'Eglise  estre  estimée  par  ie  ne  say  quelle  vaine  pompe:  à-  fin  de  ne  faire  long  propos,  ie  toucheray  seulement  en  passant  combien  cela  seroit  dangereux.  Le  Pape  de  Rome,  disentils,  qui  tient  le  siege  Apostolique,  et  les  autres  Evesques  representent  l'Eglise,  et  doyvent  estre  reputez  pour  l'Eglise:  parquoy  ils  ne  peuvent  errer.  Pour  quelle  cause?6)  Pource,  respondent-ils,  qu'ils  sont  Pasteurs  de  l'Eglise,  et  consacrez  à  Dieu.  Aaron  et  les  autres  conducteurs  du  peuple  d'Israel,  estoyent  aussi  Pasteurs.  Aaron  et  ses  fils  estoyent  ià  eleuz  Prestres  de  Dieu:  neantmoins  ils  faillirent