29:28  Ce  n'est  pas  Dieu  qui  l'a  fait.  Notons  bien  donc,  quand  nous  serons  laissez  en  nostre  naturel,  et  que  Dieu  ne  nous  guidera  point  par  sa  parolle  et  par  son  Esprit,  pour  nous  donner  une  vraye  droicture  d'intelligence  et  une  discretion  et  prudence,  qu'encores  qu'il  besongne  en  telle  facon  que  sa  iustice  apparoisse,  et  sa  vertu,  et  sagesse,  et  que  nous  en  devions  estre  conveincus:  nous  ne  laisserons  pas  toutesfois  de  mesdire  de  sa  iustice,  nous  ne  laisserons  point  de  blasphemer  contre  sa  vertu.  Et  pourquoy?  Car  nous  serons  comme  bestes  insensees.  Et  ce  mot  de  Moyse  doit  bien  estre  poise,  de  peur  que  Vennemi  ne  s'estrange.  Car  par  cela  Dieu  signifie,  que  les  hommes  au  lieu  d'appliquer  leurs  sens  a  contempler  ce  qu'il  leur  monstre,  qu'ils  s'envelopperont  en  ignorance  a  leur  escient.  Or  il  est  bien  certain,  combien  que  nous  soyons  povres  aveugles,  combien  que  nous  soyons  a  cause  du  peche  d'Adam  privez  de  iugement,  de  raison  et  d'intelligence:  toutesfois  qu'il  y  a  tousiours  de  la  malice:  que  nous  ne  demandons  que  d'ignorer  ce  que  nostre  Seigneur  nous  vouloit  faire  cognoistre.  Quand  donc  les  hommes  feront  une  couverture  de  leur  ignorance,  ils  seront  tousiours  conveincus  qu'ils  ont  voulu  ne  savoir  point  ce  qui  leur  eust  este  tout  notoire,  quand  ils  y  eussent  applique  leur  estude.  Et  voila  pourquoy  S.  Iude  parlant  en  sa  Canonique  de  ces  gens  profanes  qui  despittent  Dieu,  qui  sont  lourds  et  stupides,  comme  tous  ignorans:  Ils  ne  savent  point  (dit-il)  ce  qu'ils  devroyent  savoir,  pource  qu'ils  ne  le  veulent  point  savoir.  Voila  donc  une  maudite  couverture  aux  hommes,  toutes  fois  et  quantes  qu'ils  ne  font  point  leur  proufit  des  oeuvres  de  Dieu,  mais  qu'ils  les  appliquent  tout  au  rebours  de  son  intention.  Or  ce  qui  est  ici  dit  des  incredules,  nous  est  aussi  bien  commun:  et  n'estoit  que  Dieu  nous  approchast  de  la  clarte,  ou  bien  qu'il  approchast  la  clarte  de  nous,  et  qu'il  nous  ouvrist  les  yeux  pour  voir  ce  qu'il  nous  monstre,  il  est  certain  que  non  seulement  nous  demeurerions  tousiours  aveugles,  mais  cela  nous  feroit  empirer  de  plus  en  plus:  comme  il  est  dit,  que  les  incredules  eussent  blaspheme  Dieu,  disans  :  Nostre  main  est  haute,  ce  n'est  point  Dieu  qui  a  fait  ceci.  D'un  coste  donc  nous  laissons  la  Dieu  a  part,  comme  s'il  n'avoit  rien  fait:  et  puis  il  y  a  ceste  arrogance  de  nous  mettre  en  son  lieu.  Car  les  hommes  ne  se  contentent  point  d'avoir  despouille  Dieu  de  sa  vertu,  et  obscurci  sa  maieste  :  mais  ils  se  veulent  revestir  de  ses  plumes,  et  se  font  eux-mesmes  idoles,  et  voudroyent  qu'on  les  estimast  avoir  fait  ce  qui  est  propre  a  Dieu.  Ainsi  donc  voyant  qu'il  y  a  un  orgueil  si  enrage  en  nous,  qu'il  y  a  une  arrogance  si  lourde:  d'autant  plus  devonsnous  estre  admonnestez  de  nous  ranger  a  Dieu,  pour  le  prier  que  non  seulement  il  nous