25:28  quia  extorta  haec  cessatio,  in  locum  voluntarii  sabbathi  succedet.  39.  Et  qui  remanserint  Alia  ultio,  quod  tametsi  maneant  ad  tempus  superstites,  paulatim  tabescent.  Atque  hoc  quidem  tam  ad  captivos  quam  ad  eos  qui  residui  fuerint  in  terra  referri  potest.  Antehac  minatus  est  illis  interitum,  vel  a  fame,  vel  a  gladio:  nunc  vero  ne  glorientur  se  fuisse  elapsos,  qui  non  fuerint  subita  morte  abrepti,  eos  quoque  lente  perituros  esse  denunciat:  modumque  simul  exprimit,  quia  trepidatione  implebit  eorum  corda,  ut  nemine  persequente  fugiant:  sicuti  etiam  apud  Solomonem  legitur:  Et  paveant  ad  sonitum  folii  cadentis.  Quibus  verbis  significat  impios,  quamvis  ab  externis  molestiis  liberi  sint,  nihilo  tamen  melius  habere:  quia  intus  caecis  tormentis  lacerantur.  Quamvis  enim  ad  furorem  usque  prosiliat  eorum  audacia,  fieri  tamen  non  potest  quin  mala  conscientia  eos  subinde  excruciet.  Reddit  eos  interdum  stupidos  Dei  oblivio,  imo  sensum  omnem  exuere  affectant  :  sed  ubi  Deus  ita  obbrutescere  passus  est,  mox  illis  veternum  excutit,  adeoque  praecipitat,  ut  sint  ipsi  sui  carnifices.  Docet  autem  hic  locus,  quo  robustiores  sunt  impii  ad  Dei  contemptum,  eo  magis  debilitari,  ut  ab  umbra  sua  metuant:  haec  autem  conditio  longe  miserior  quam  statim  absumi.  40.  Donec  confiteantur.  Quanquam  de  poenis  valde  saevis  et  atrocibus  concionatus  est  Moses,  docet  tamen  etiam  in  illo  formidabili  rigore  Deum  fore  placabilem:  si  modo  resipiscat  populus,  quamlibet  diuturnis  sceleribus  spem  veniae  sibi  abstulerit.  Neque  enim  quoslibet  peccatores  alloquitur:  sed  qui  sua  pervicacia,  belluinoque  impetu  magis  ac  magis  accenderint  Dei  vindictam:  eos  tamen  bene  sperare  iubet,  si  ex  animo  conversi  fuerint.  Teneamus  ergo,  Dei  misericordiam  perditis  hominibus  offerri,  et  qui  in  profunda  desperationis  abysso  sua  culpa  demersi  sunt,  ac  si  ad  inferos  usque  penetraret.  Unde  etiam  sequitur,  poenis  omnibus  quasi  stimulis  pigros  ac  tardos  urgeri  ad  poenitentiam:  plagas  vero  duriores  ad  frangendam  eorum  duritiem  tendere.  Simul  tamen  notandum  est,  singulari  privilegio  hanc  gratiam  Dei  ecclesiae  fieri:  sicuti  paulo  post  diserte  Moses  causam  assignat,  quod  Deus  memor  futurus  sit  foederis  sui.  Unde  liquet,  Deum  gratuitae  suae  adoptionis  respectu,  propitium  fore  indignis  quos  elegit.  Ex  quo  rursum  conficitur,  modo  ne  claudamus  nobis  ipsis  spei  ianuam,  quamvis  innumeras  mortes  meriti  simus,  Deum  tamen  ad  nos  sibi  reconciliandos  ultro  semper  occurrere,  tantum  foedus  a  quo  nostra  culpa  excidimus,  quasi  naufragii  tabulam  quae  nos  in  portum  salvos  deferat  amplectamur.  Probe  vero  expendere  convenit  quos  hic  commemorat  Moses  resipiscentiae  fructus.  Primo  loco  ponitur  confessio:  non  qualis  exigitur  sub  papatu,  ut  se  miseri  homines  in  aurem