24:28  violenter  premi,  se  offerre  patronos,  et  quantum  in  se  est  intercedere:  ne  robustior  praevaleat.  Fieri  hoc  vix  potest  quin  exasperemus  eos  qui  prompti  sunt  ad  nocendum:  sed  nihil  tanti  esse  nobis  debet  ut  eorum  protervia  obruatur  aequitas,  nobis  tacentibus.  Nam  dissimulatio  in  hac  parte  species  est  consensus.  Modice  autem  et  lenibus  verbis  eum  castigat  Moses,  qui  fratri  erat  iniurius:  quia  non  tam  exprobrare  vult  culpae  gravitatem  quam  remedium  quaerit  sedandae  eius  ferociae.  14.  Quis  te  constituit.  Nihil  mirum  si  homo  scelestus  ac  nequam  adeo  placidam  admonitionem  contumaciter  repellit.  Sic  enim  solent  quibus  ius  et  fas  perrumpere  decretum  est,  simul  atque  arguuntur,  tumultuari,  et  conviciis  abigere  probos  monitores.  Et  certe  rarae  virtutis  est  culpam  agnoscere,  et  modeste  admittere  correctionem.  Quo  autem  quisque  deterior  est  atque  gravius  peccavit,  eo  magis  superbit  admonitus,  et  maiore  licentia  iurgatur:  ideoque  ad  hanc  indignitatem  ferendam  paratos  esse  oportet  quicunque  ad  compescendos  improbos  se  accingunt.  Et  tamen  ex  petulantia  unius  colligere  licet  quam  perversa  fuerint  totius  fere  gentis  ingenia.  Qua  ratione  Stephanus  dicit  (Act.  7,  35)  Mosen  fuisse  a  suis  reiectum,  unde  omnes  ingratitudinis  convincit.  Verum  ut  populo  parcatur,  docemur  hoc  exemplo  quam  indomabilis  sit  eorum  natura  quos  Deus  non  mansuefecit.  Neque  enim  minus  duriter  castigationes  repellit  eorum  pervicacia,  quam  ab  incude  excipitur  ictus  mallei.  Quando  igitur  ita  sunt  praefracti  ut  decies  fracti  nunquam  tamen  corrigantur:  nihil  mirum  si  Deus  in  illos  asperius  saeviat,  quemadmodum  facturum  se  denunciat  per  os  Davidis  (Psal.  18,  27).  Hoc  ne  experiamur,  mature  nos  submittamus  Dei  ferulis:  et  quando  non  omnibus  datum  est  rogemus  ut  nos  ad  veram  docilitatem  formet.  Quid  enim  proficiemus  contra  stimulum  calcitrando?  Adde  quod  talem  contumaciam  sequitur  comes  belluina  quaedam  immanitas,  ut  in  hoc  exemplo  iterum  cernimus.  Rogat  Mosen  vile  et  abiectum  mancipium  quis  eum  constituit  iudicem  super  Hebraeos:  ac  si  non  esset  ipse  cum  toto  suo  genere  expositus  omnium  contumeliis.  Colaphum  si  quis  incussisset  ex  infima  plebe  aegyptiaca,  non  ausus  esset  mutire:  contra  blandam  admonitionem  non  minus  imperiose  protervit  ac  si  ab  omni  subiectione  esset  liber.  Deterius  etiamnum  quod  sequitur,  an  vis  me  occidere  sicut  Aegyptium?  Debuerat  Mosen,  ob  tale  pii  studii  documentum,  non  secus  ac  Dei  angelum  amplecti:  atqui  beneficium  in  crimen  vertens,  non  modo  odiose  exprobrat  quod  laude  prosequi  aequum  erat,  sed  etiam  minatur.  Interea  dubium  non  est  quin  perculsus  fuerit  sanctus  vir  impetuosa  tentationis  machina,  ubi  in  gente  sua  deprehendit  tantam  barbariem.  Aegyptios  quidem  sciebat  sibi  professos