11:28  Gratia  tibi  a  Deo  patre  nostro  et  Domino  Iesu  Christo,  frater  mihi  observande.  Nescio  qui  factum  sit  ut  totum  fere  sesquiannum  ex  quo  huc  concessi,  nihil  ad  te  literarum  prorsus  dederim  :  quum  et  saepe  habuerim  in  animo  id  facere,  nec  deesset  argumentum,  et  oblata  fuerit  non  semel  occasio.  Sed  quum  primis  mensibus  non  venisset  in  mentem,  et  iam  aliquantum  temporis  praeterisset,  quasi  amissa  opportunitate  factus  sum  in  posterum  negligentior.  Nuper  vero,  quum  Erasmus  vester,  dum  hic  apud  nos  erat,  operam  mihi  suam  obtulisset  ad  ferendas  literas,  si  quas  vellem  scribere,  avide  arripui,  quod  maxime  expetebam.  Promisi  ergo  me  scripturum.  Quia  tamen  sero  domum  e  diversorio  eius  redieram,  et  ipse  postridie  mane  abire  statuerat,  profectionem  eius  nolui  morari,  quanquam  pro  sua  humanitate  paratus  erat  exspectare,  si  tantum  mihi  placere  indicassem.  Sed  quo  erat  ad  obsequendum  propensior,  eo  magis  puduit  ipsum  rogare,  praesertim  quum  possem  triduo  post  literas  submittere  Basileam,  unde  facile  ad  te  perferri  poterant.  Tametsi  autem  illa  quoque  opportunitas  mihi  elapsa  erat,  putavi  tamen  mihi  aliquando  agendum  esse  quod  nimis  diu  distuleram.  Quid  autem  potius,  mi  Bullingere,  hoc  tempore  agamus  scribendo,  quam  ut  fraternam  inter  nos  amicitiam  et  conservemus  quibuscunque  possumus  modis,  et  confirmemus?  Videmus  enim  quanti  intersit,  non  nostra  modo,  sed  totius  christiani  nominis,  eos  omnes  quibus  aliquam  in  ecclesia  sua  personam  imposuit  Dominus,  vera  inter  se  consensione  conspirare.  Id  quoque  videt  Satan  ipse,  qui  dum  exitium  regno  Christi  modis  omnibus  machinatur,  nullam  in  rem  magis  incumbit,  quam  ut  dissidia  inter  nos  serat,  vel  certe  alios  ab  aliis  utcunque  alienet.  Proinde  officii  nostri  est,  eiusmodi  artibus  obviam  ire,  et  quo  magis  nititur  hostis  ille  noster  coniunctionem  nostram  distrahere,  eo  constantiore  animo  ac  intentiore  cura  eniti  ad  eam  fovendam.  Quum  autem  sedulo  nobis  id  curandum  est,  ut  cum  omnibus  Christi  ministris  societatem  amicitiamque  colamus,  tum  vero  inprimis  contendere  in  hoc  nervos  omnes  necesse  est,  ut  ecclesiae,  quibus  verbum  Domini  administramus,  fideliter  inter  se  consentiant.  Ego  amicitiam  nostram  quibus  auspiciis  inita  est,  et  quibus  nunc  fulturis  sustinetur,  salvam  atque  integram  ad  extremum  fore  confido.  Ego  certe,  quantum  in  me  erit,  daturum  me  operam  recipio,  ut  firma  perseveret.  Nam  quia  semper  tibi  plurimum  detuli,  singulari  etiam  dilectione,  ut  par  erat,  complexus  sum,  nec  isto  in  te  animo  unquam  esse  desinam.  Inter  hanc  ecclesiam  ac  vestram,  tametsi  video  nihil  esse  dissidii  aut  simultatis,  plus  tamen  coniunctionis,  vel  potius  necessitudinis  esse  cuperem.  Unde  autem  id  fiat,  quominus  sic  inter