47:279  279  IN  EVANGELIUM  IOANNIS  280  nihilo  intentant.  Longior  est  apud  alios  evangelistas  Christi  responsio,  summa  tamen  eadem.  Unctio  quam  Iudas  culpabat  hoc  nomine  defenditur,  quod  sit  sepulcralis.  Ergo  non  probat  Christus  quasi  ordinarium  cultum,  et  cuius  communis  in  ecclesia  esse  debeat  usus.  Nam  si  quotidie  tale  sibi  officium  praestari  vellet,  quidvis  potius  dixisset  quam  hoc  sepulturae  suae  datum.  Et  certe  Deus  externas  pompas  non  moratur.  Imo  quum  nimis  proclive  ad  carnales  ritus  hominis  ingenium  esse  videat,  subinde  nos  in  illis  parcos  et  sobrios  esse  iubet.  Quare  praeposteri  sunt  interpretes,  qui  ex  Christi  responso  inferunt,  placere  Deo  sumptuosos  et  magnificos  cultus:  quum  potius  Mariam  excuset,  eo  quod  extraordinarium  sibi  officium  praestiterit,  quod  ad  perpetuam  colendi  Dei  normam  exigi  non  decebat.  In  diem  sepulturae  ete.  Quum  dicit  servatum  fuisse  unguentum,  significat  non  intempestive  profusum  esse,  sed  pro  temporis  circumstantia.  Servari  enim  dicitur,  quod  habetur  quasi  sub  custodia,  ut  commode  et  opportune  promatur.  Certum  enim  est,  si  quis  sumptuosis  delitiis  eum  ante  onerasset,  non  fuisse  passurum.  Atqui  negat  ex  more  fecisse  Mariam,  sed  ut  sibi  extremum  officium  impenderet.  Porro  corporum  unctio  tunc  non  inanis  caeremonia  erat,  sed  potius  spirituale  symbolum,  quod  spem  resurrectionis  ante  oculos  poneret.  Obscurae  adhuc  erant  promissiones,  nondum  resurrexerat  Christus,  qui  non  immerito  vocatur  resurgentium  primitiae  (1.  Cor.  15,  20).  Ergo  opus  talibus  adminiculis  habebant  fideles,  quae  ad  Christum  adhuc  absentem  eos  dirigerent.  Ideo  non  superflua  tunc  fuit  Christi  unctio,  quum  mox  sepeliendus  foret:  ungitur  enim  tanquam  in  sepulcrum  condendus.  Id  nondum  sciebant  discipuli,  et  Maria  procul  dubio  repente  impulsa  fuit,  ut  spiritu  directore  id  iaceret,  quod  prius  non  fuerat  meditata.  Verum  Christus  ad  spem  resurrectionis  suae  accommodat,  quod  illi  tantopere  improbabant,  ut  ipsa  utilitas  eos  a  prava  morositate  revocet.  Verum  ut  Deus  veteris  populi  pueritiam  talibus  exercitiis  regi  voluit,  ita  hodie  absurdum  esset  idem  tentare,  nec  sine  Christi  iniuria  fieret,  qui  splendore  adventus  sui  tales  umbras  discussit.  Sed  quia  nondum  eius  resurrectio  figuris  legis  complementum  attulerat,  externo  ritu  ornanda  fuit  eius  sepultura.  Nunc  odor  resurrectionis  eius  satis  per  se  efficaciae  habet  absque  nardo  et  aromatibus,  ut  totum  orbem  vivificet.  Caeterum  meminerimus  in  iudicandis  hominum  factis  standum  esse  unius  Christi  sententiae,  ad  cuius  tribunal  semel  nos  stare  oportet.  8.  Pauperes  enim  semper  habetis.  Tenendum  est  quod  prius  admonui,  extraordinarium  Mariae  factum  diserte  hic  a  quotidiano  Christi  cultu  discerni.  Quare  simiae  sunt,  non  imitatores,  qui  pompis  et  sumptuoso  apparatu  Christum  colere  affectant:  ac