1:279  CHRISTIANAE  RELIGIONIS  INSTITUTIO.  CAPUT  PRIMUM.  DE  COGNITIONE  DEI,  quae  primum  est  religionis  fundamentum;  et  unde  vera  eius  regula  sit  petenda.  1.  Tota  fere  sapientiae  nostrae  summa,  quae  vera  demum  ac  solida  sapientia  censeri  debeat,  duabus  partibus  constat:  cognitione  Dei,  et  nostri.  Illa  scilicet,  quae  non  modo  unum  esse  Deum  ostendat,  quem  ab  omnibus  oporteat  coli  et  adorari,  sed  simul  etiam  doceat,  illum  unum  omnis  veritatis,  sapientiae,  bonitatis,  iustitiae,  iudicii,  misericordiae,  potentiae,  sanctitatis  fontem  esse,  ut  ab  ipso  et  exspectare  et  petere  universa  ista  discamus,  praeterea,  cum  laude  et  gratiarum  actione  accepta  illi  referre.  Altera  autem,  quae,  nostram  nobis  imbecillitatem,  miseriam,  vanitatem,  foeditatem  ostendendo,  primum  nos  in  seriam  humilitatem,  deiectionem,  diffidentiam,  odiumque  nostri  adducat,  deinde  quaerendi  Dei  in  nobis  desiderium  accendat,  nempe  in  quo  repositum  sit  omne  bonum,  cuius  ita  inanes  et  vacui  deprehendimur.  2.  Utra  autem  alteram  praecedat  ac  ex  se  pariat,  non  facile  est  discernere.  Nam  ut  in  homine  reperitur  quidam  omnium  miseriarum  mundus,  intueri  nos  1)  recte  non  possumus,  quin  propriae  infelicitatis  conscientia  feriamur  ac  pungamur:  quo  statim  ad  Dominum  tollamus  oculos,  ac  in  aliquam  saltem  eius  notitiam  veniamus.  Ita  ex  tenuitatis,  hebetudinis,  vanitatis,  pravitatis  denique  et  corruptionis  propriae  sensu  recognoscimus,  non  alibi  quam  in  Domino  sitam  esse  veram  magnitudinem,  sapientiam,  veritatem,  iustitiam  et  puritatem;  atque  adeo  malis  nostris  ad  Dei  bona  consideranda  excitamur,  nec  ante  ad  illum  serio  aspirare  possumus,  quam  coeperimus  nobis  ipsis  prorsus  displicere.  Quis  enim  hominum  non  libenter  in  se  requiescat?  Quis  etiam  1)  add.  ipsos  1543  et  seqq.