51:278  qu'il  n'y  a  autre  cause  pour  discerner  les  uns  d'avec  les  autres:  et  que  ceux  qu'il  a  reprouvez  perissent  pource  qu'ils  en  sont  dignes  :  et  ceux  qu'il  appelle  a  salut  ne  doyvent  cercher  la  cause  ailleurs  sinon  en  ceste  adoption  gratuite.  Et  au  reste,  par  ces  deux  mots  S.  Paul  nous  a  aussi  voulu  inciter  a  une  plus  grande  affection,  et  plus  ardente  de  louer  Dieu.  Car  ce  n'est  point  assez  que  nous  confessions  froidement  que  nostre  salut  procede  de  sa  pure  liberalite:  mais  il  faut  que  nous  soyons  comme  enflammez  pour  nous  adonner  du  tout  a  sa  louange,  comme  si  nous  estions  pleinement  dediez  a  cela:  ainsi  que  S.  Pierre  aussi  le  remonstre,  puis  que  nous  sommes  retirez  des  tenebres  de  mort,  c'est  bien  raison  que  nous  racontions  les  louanges  inenarrables  de  Dieu.  Et  par  cela  il  nous  advertit  que  quand  les  fideles  auront  fait  tous  leurs  efforts  de  s'acquitter  envers  Dieu,  louant  sa  bonte,  qu'encores  ils  n'en  viendront  iamais  a  bout,  car  c'est  une  chose  incomprehensible.  Voila  donc  ce  que  nous  avons  a  retenir.  Et  ainsi  de  ceste  bonte  dont  il  parle,  ou  de  ceste  grace,  il  nous  faut  retenir  que  iusques  a  ce  que  les  hommes  soyent  du  tout  aneantis,  et  qu'il  ne  leur  reste  point  une  seule  goutte  en  quoy  ils  se  puissent  glorifier,  que  iamais  la  gloire  qui  appartient  a  Dieu  ne  luy  sera  rendue.  Prenons  le  cas  qu'on  ne  fist  iamais  memoire  de  l'election  de  Dieu:  laisseroitil  pourtant  d'estre  loue?  Nenni:  mais  ce  seroit  en  partie.  Car  quand  on  dira  seulement  que  Dieu  fait  luire  son  soleil  sur  les  hommes,  voila  de  quoy  le  magnifier.  Quand  nous  ouvrons  les  yeux  pour  contempler  haut  et  bas  les  oeuvres  admirables  qu'il  nous  monstre,  voila  ample  argument  pour  nous  exercer  en  sa  louange  tout  le  temps  de  nostre  vie.  Il  y  a  encores  plus,  que  quand  son  Evangile  nous  est  presche,  il  y  a  aussi  de  quoy  pour  louer  Dieu,  encores  qu'on  ne  parlast  point  de  son  election:  ie  di  assez,  pour  nostre  regard:  mais  il  seroit  frustre  du  principal  de  sa  louange,  et  nous  ne  luy  rendrions  sinon  en  partie  ce  qui  luy  est  deu.  Et  pourquoy?  Car  les  fideles  penseroyent  avoir  la  foy  de  leur  mouvement  propre  et  de  leur  volonte.  Nous  avons  dit  ce  matin  que  la  foy  est  un  fruict  de  l'election:  car  nous  ne  sommes  discernez  d'avec  les  incredules,  sinon  d'autant  que  Dieu  nous  a  tendu  la  main  et  qu'il  nous  a  attirez  d'une  facon  secrete,  du  temps  que  nous  luy  tournions  le  dos  et  que  nous  estions  faits  estranges  de  luy.  En  somme,  non  sans  cause  sainct  Paul  dit  ici  que  la  louange  de  Dieu  ne  sera  point  glorifiee  comme  elle  le  merite,  iusques  a  tant  que  nous  ayons  cognu  que  son  election  est  cause  de  tous  les  biens  qu'il  nous  eslargit:  et  que  si  nous  n'estions  adoptez  de  luy  par  sa  misericorde  infinie  et  selon  son  conseil  eternel,  que  nous  aurions  une  partie  de  la  louange  qui  luy  est  deue.  Or  Dieu  seroit  diminue  et  amoindri  d'autant.  En  somme  18*