29:278  quaecunque  tandem  illa  fuerit,  animad  vertite  non  contentum  Elcanam  communi  omnium  officio,  etiam  ex  abundanti  grati  animi  testimonium  adiicere,  quo  accepturum  a  Deo  beneficiorum  se  memorem  et  gratum  professus,  gratias  illi  publice  agat.  Nam  superius  votorum  hunc  esse  finem  docuimus,  publicam  nempe  professionem,  qua  Deo  uni  omnia  accepta  feruntur,  eique  pro  acceptis  beneficiis  sacrificia  laudis  offeruntur.  De  Silunte  vero  sciendum,  fuisse  locum  in  quo  arca  tum  quiescebat:  ac  proinde  in  quem  fuit  singulis  conveniendum.  Neque  enim  adhuc  Deus  certum  locum  habitationi  ac  quieti  delegerat,  quemadmodum  quum  de  Hierosolyma  loquitur  scriptura,  locum  quietis  et  domicilii  sempiterni  eam  vocat.  Arca  enim  tunc  temporis  nullam  fixam  sedem  habebat,  sed  ex  loco  uno  in  alium  transferebatur,  ut  tandem  etiam  capta  sit  ab  hostibus.  Sed  tunc  eam  Silunte  Deus  esse  voluit,  qui  postea  locus  de  solatus  est,  non  sine  magna  omnium  admiratione.  Quamobrem  etiam  Ieremias  Iudaeos  illo  suo  templo  nimis  insolenter  gloriantes  conspiciens,  eandem  illis,  quae  olim  Silunti  contigerat,  desolationem  minatur,  his  verbis  :  Ite  iam  in  locum  meum  qui  erat  Schilunte,  ubi  feceram  ut  habitaret  nomen  meum  primum,  et  videte  id  quod  feci  propter  malitiam  populi  mei  Israelis,  vos  vero  potentiores  Deo  arbitramini?  Quo  facto  Deus  testatum  facere  voluit,  licet  terrenum  aliquem  locum  suo  cultui  delegisset,  non  tamen  se  in  omne  aevum  illi  veluti  data  fide  adstrictum.  Inde  factum  ut  captivitatis  babylonicae  tempore,  destructis  ac  desolatis  licet  locis,  quae  tamquam  terrenum  aliquem  paradisum  Deus  elegerat,  et  in  quibus  aliquot  saecula  quieverat,  non  ideo  tamen  abolita  sint  sacrificia.  Porro  si  Deus  olim  suorum  iudiciorum  severitatis  exempla  in  ea  loca,  quae  tanquam  paradisos  terrenos  sibi  selegerat,  et  in  quibus  per  longa  saecula  domicilium  habuerat,  voluit  exstare,  quis  adeo  vaecors  et  hebes  est,  ut  hodie  certis  locis  eum  adfixum  esse  sibi  persuaderi  patiatur:  quemadmodum  papam  illum  romanum  videmus  de  sua  sede  gloriantem,  quod  Petrus  Romae  sederit?  An  vero  Petrus  regnum  coelorum  Romam  transtulit,  quod  sibi  Hierosolymis,  celebri  civitate,  verisimile  est  potuisse  iure  meliore  arrogare?  An  vero  Deum  infanti  similem  arbitramur,  qui  se  vi  quadam  retineri  patiatur,  tanquam  mancipatum  iis  locis,  ex  quibus  illum  tot  facinora  et  abominanda  flagitia  pellunt:  an  illis  adstrictum  a  quibus  etsi  verbis  quidem  in  honore  habetur,  nomen  ipsius  tamen  foedissime  polluitur  et  conspurcatur?  Nae  ingens  et  intolerabilis  error  iste  est.  Quare  licet  ad  tempus  suae  arcae  Deus  Schilunte  domicilium  elegit,  tamen  in  eum  locum  exstare  deinceps  suorum  iudiciorum  exempla  voluit,  ut  populus  monimentum  haberet,  in  quod  tanquam  in  speculum  intuitus,  ad  iudicia  Dei  horrere,  et  sincere  ac  sine  fuco  in  pos-  18*