10.1:278  si  hic  pluribus  te  morer,  Caesar,  coram  quo  nullam  huius  rei  mentionem  facere  opus  fuerat,  nisi  ut  te  verecunde  monerem,  quam  fidem  mereantur  tam  effrontes  calumniatores.  Eiusdem  generis  est,  quod  iactarunt,  consensisse  me,  vel  certe  favisse  Anabaptistis.  Autores  huius  calumniae  suis  nominibus  non  notabo.  Nam  et  mihi  molestum  est,  quod  se  ita  ipsi  infament,  ac  omnem  in  posterum  fidem  suam  apud  bonos  viros  elevent.  Sed  tamen  usitatum  est  hoc  illis  stratagema,  Anabaptistas  vocare  quotquot  non  consentiunt  vulgaribus  corruptelis.  Ut  iam  principum  aures  ad  hanc  cantilenam  occalluisse  putem.  Quo  fit,  ut  longiori  responsione  non  indigeat.  Sed  illud  nimirum  est:  nil  de  nobis  dici  tam  absurdum  posse,  quod  non  fidem  inveniat,  etsi  ne  ullam  quidem  prae  se  ferat  veri  speciem,  nisi  nos  respondeamus.  Hic  enim  [pag.  14]  si  uno  verbo  totam  meam  defensionem  conclusero,  iniuriam  mihi  ab  iis  fieri,  qui  illud  obiiciant,  quod  ne  per  somnium  quidem  unquam  cogitavi,  peracta  breviter  causa  fuerit.  Omnino  enim  eorum  probare  est,  quod  obiiciunt:  certumque  est  accusationem,  quae  sua  probatione  destituitur,  pro  mera  haberi  calumnia.  Iam  vero  quae  tandem  indicia  adversum  me  proferre  possunt,  quae  vel  tenuem  coniecturam  ingerant:  certe  nihil  est  quod  reformidem.  Sed  si  iis  tantum  ultro  indulgetur,  ut  nuda  eorum  accusatio  fidem  habeat,  nisi  contrarium  ipse  probem:  saltem  vel  id  mihi  tribuatur,  ut  hac  conditione  audiar.  Primum  igitur  dico,  nullum  unquam  mihi  verbum  excidisse,  quod  ullam  huiusce  criminis  suspicionem  praebuerit.  Et  sane  tam  vana  et  inepta  esse  audio  Anabaptistarum  deliria,  ut  non  nisi  omnium  literarum  rudes  plane  homines  circumveniant.  Caeterum  quo  me  beneficio  Dominus  affecit,  adeo  non  sum  alienus  a  literis,  quin  et  legere  possim,  et  aliquid  iudicare.  Sicuti  et  a  puero  haec  me  studia  semper  oblectarunt:  et  hoc  quoque  nomine  aliqua  mihi  intercessit  necessitudo  cum  doctis  viris  et  literatis.  Sic  itaque  omnis  a  me  aditus  Anabaptistis  obstructus  erat,  ut  etiam  si  aspirarent,  [pag.  15]  frustra  id  ab  iis  factum  esset.  Certe  ab  eorum  haeresi  sic  perpetuo  abhorrui,  ut  quoties  mentio  eius  aliqua  facta  est,  quid  sentirem,  minime  dissimulaverim.  Cuius  rei  nec  paucos,  nec  leves  testes,  qui  meis  sermonibus  interfuerunt,  commemorare  possum.  Atque  adeo,  quum  minime  ignorarem,  magna  astutia  eos  irrepere  in  animos  simpliciorum  hominum,  sedulo  curavi  ut  haec  pestis,  quam  perniciosissimam  iudicabam,  prorsus  a  tota  domo  mea  et  familia  arcere  tur.  Rogentur  ipsi  Anabaptistae,  an  me  in  suorum  numero  habeant.  Cuperent  certe  ita  esse,  et  libenter  gloriarentur,  si  ita  esset.  Sed  nunquam  me  suum  esse  ipsi  fatebuntur.  Ac  nescio  sane  an  qui  me  hoc  nomine  infamant,  eadem  con-  18*