1:278  Habes,  Rex  magnificentissime,  satis  multis  expositam  calumniatorum  virulentam  iniquitatem,  ne  in  eorum  delationes  ultra  modum  credula  aure  propendeas.  Vereor  etiam  ne  nimis  multis:  quando  haec  iam  praefatio  ad  iustae  paene  apologiae  modum  accedit;  qua  non  defensionem  texere,  sed  duntaxat  ad  ipsam  causae  actionem  audiendam  animum  tuum  praemollire  1)  studui,  aversum  quidem  nunc  et  alienatum  a  nobis,  addo  etiam  inflammatum;  sed  cuius  gratiam  recolligere  nos  posse  confidimus,  si  hanc  nostram  confessionem  quam  pro  defensione  apud  tuam  maiestatem  esse  volumus,  placidus  compositusque  semel  legeris.  Sin  vero  ita  aures  tuas  occupant  malevolorum  susurri,  ut  nullus  sit  reis  pro  se  dicendi  locus,  importunae  vero  illae  furiae,  te  connivente,  semper  vinculis,  flagris,  equuleis,  sectionibus,  incendiis  saeviunt:  nos  quidem,  velut  oves  mactationi  destinatae,  ad  extrema  quaeque  redigemur;  sic  tamen,  ut  in  patientia  nostra  possideamus  animas  nostras,  et  manum  Domini  fortem  exspectemus;  quae  indubie  tempore  aderit,  et  sese  armata  exseret,  tum  ad  pauperes  ex  afflictione  eruendos,  tum  etiam  ad  vindicandos,  qui  tanta  securitate  nunc  exsultant,  contemptores.  Dominus  rex  regum,  thronum  tuum  iustitia  stabiliat,  et  solium  tuum  aequitate,  fortissime  ac  illustrissime  Rex.  Basileae  Calend.  Augusti,  Anno  MDXXXVI.  1)  permollire  1539.  1543.