6:277  DE  LIBERO  ARBITRIO.  runt.  Sed  haec  omnia  parum  valerent,  nisi  haec  primum  cordibus  nostris  insculpta  foret  notitia,  eam  in  verbo  Dei,  non  hominum  opinione  consistere.  In  eo  proinde  graviter  peccat  Pighius,  quod  dam  ecclesiasticae  traditionis  praetextu  a  scriptura  nos  avocat,  divortium  facit  perpetuae  illius  coniunctionis,  sine  qua  parum  firmitatis  habet  ecclesiae  magisterium.  Negabit  hoc  se  facere,  quia  secundum  scripturae  locum  assignet.  Hoc  est,  scilicet,  suam  sacrosancto  Dei  verbo  gloriam  dare,  ut  quum  hominum  placitis  inviolabilis  constiterit  maiestas,  ad  eorum  consensum  quoquo  modo  postea  detorqueatur,  ut  illis  subserviat.  An  non  enim  hoc  disertis  verbis  exprimit?  Necessarium  est,  inquit,  illud  principium,  ab  ecclesiae  traditione  regulam  [pag.  62]  orthodoxae  fidei  sumi:  quando  illa  demum  sola  est  veritas  credenda,  quae  in  nullo  ab  ea  discordat.  Ab  hac  igitur  nos  inprimis,  et  ante  omnia,  exordiemur:  quando  haereticorum  tergiversationibus,  contradictionibus,  calumniis  non  perinde  exposita  est,  ut  sunt  scripturae:  secundo  nihilominus  loco  scripturarum  quoque  sententiam  demonstrabimus.  En  praeclara  hominis  theologia:  quidquid  homines  statuerint,  ratum  et  authenticum  esse  oportet,  de  verbo  Dei  postea  viderimus.  Quid  si  manifesta  interdum  repugnantia  inter  hominum  decreta  et  Dei  oracula  se  ostendat?  nam  id  evidenter  a  nostris  demonstratum  est.  Qualis  erit  dissidii  compositio,  autore  Pighio,  qui  verbum  Dei  inferiore  loco  subsidere  vult,  nisi  ut  illi  silentium  indicat?  Ne  tamen  de  re  non  necessaria  frustra  digladiemur,  lectores  monitos  velim,  non  difficulter  posse  inter  me  et  Pighium  hoc  loco  convenire,  si  modo  ecclesiae  traditionem,  ex  certo  et  perpetuo  sanctorum  et  orthodoxorum  consensu,  non  ex  testimoniis  hinc  inde  male  excerptis,  demonstraret:  deinde  si  iis  simpliciter  et  candide  uteretur  ad  veram  et  germanam  ecclesiae  doctrinam  comprobandam,  non  ad  pingendas  horum  temporum  impias  doctrinas  abuteretur.  Ecclesia  columna  est  et  firmamentum  veritatis,  inquit  Paulus  (1  Tim.  3,  15),  nempe  quia  verbum  suum  Dominus  apud  eam  deposuit,  cuius  ministerio  traderetur.  Illa  igitur  habenda  est  ecclesia,  quae  fida  est  custos  verbi  Dei,  quae  purum  illud  et  nullo  fermento  infectum  suo  ministerio  conservat  et  ad  posteros  propagat.  Huius  honoris  et  officii  portionem  aliquam  sibi  vendicant  singulae  ecclesiae:  sed  non  semper  in  solidum  hoc  sibi  arrogare  ausint.  Nunc  si  ex  privato  paucorum  sensu  communem  ecclesiae  consensum  facere  velit  Pighius,  eumque  ex  apostolorum  traditione  natum  esse  asserat,  non  recipiam.  Dicet,  Origenem,  Tertullianum,  et  alios  similes  huic  obiectioni  occurrere,  dum  nihil  se  [pag.  63]  dicturos  praefantur,  quod  non  communiter  ecclesiae  ab  ipsis  apostolis  edoctae  sentiant.  Quid  autem,  si  huic  prooemio  res  non  respondeat?