7:276  est?  Illa  certe  vitia,  quibus  ego  causam  imputo,  Dei  iudicio  damnata  esse  constat.  Quod  si  audiendi  sint  homines,  dum  causas  ex  cerebro  proprio  quaslibet  comminiscuntur,  non  minus  specioso  colore  Graecia,  stante  adhuc  illic  salva  imperii  maiestate  et  potentia,  Romanis  exprobrare  poterat,  poenam  eos  pendere  suae  rebellionis,  quod  sedi  constantinopolitanae  in  primatus  controversia  restitissent.  Etsi,  quemadmodum  superius  retuli,  non  tunc  ambiebat  primatum  romanus  episcopus,  quum  agitari  coepit  contentio,  sed  ne  inferior  constantinopolitano  foret,  locum  suum  tuebatur.  In  summa,  unum  esse  peccatum  in  mundo  dignum  ira  Dei,  dignum  omnibus  poenis,  malorum  [pag  70]  denique  omnium  fontem,  persuadere  vult  Frenesius,  quod  sibi  non  obsequantur  omnes,  quod  non  a  suo  nutu  pendeant,  quod  non  suum  adorent  numen  loco  Dei.  Quis  nisi  mente  abalienatus,  persuaderi  sibi  sinat?  Quod  si  ad  fidem  habendam  paratos  habeat  omnes,  primum  ostendat,  oportet,  quid  commeriti  fuerint  Hungari,  quorum  nihilo  melior  est,  quam  Graecorum  conditio.  Expone,  inquam,  nobis,  phrenetice,  quo  suo  delicto  in  eandem  cum  Graecis  servitutem  coniecti  fuerint  Hungari,  quibus  non  aliter  semper  abusus  es,  atque  vilissimis  mancipiis,  et  qui  perinde  ac  servi  ergastulis  inclusi,  vincti  compedibus,  nullum  tuum  imperium  recusarunt.  Quam  ergo  pueriliter  ineptis,  dum  quasi  re  confecta,  superciliose  pronuncias,  nunquam  sedis  tuae  impune  spretam  fuisse  tyrannidem?  At  certum  est,  non  leviter  moveri  Christum  vicarii  sui  contemptu.  Pergesne  igitur,  os  putidum,  ita  Christo  illudere?  Primum,  quis  te  ad  hunc  honorem  evexit?  Nemo  enim,  teste  apostolo,  sumere  sibi  honorem  debet,  nisi  vocatos.  Dictum  est  Petro:  Pasce  oves  meas.  Excipio,  omnibus  idem  esse  dictum.  Veteres  illi  fumi,