6:276  sine  ullo  fructu.  Ubi  autem  res  postulat,  non  verbis  modo,  sed  exemplo  demonstrat,  non  aliter  quam  ex  ipso  Dei  verbo  de  fide  et  disputandum  et  definiendum.  Neque  aliam  sequuti  sunt  rationem  orthodoxi  omnes,  quum  rectam  puramque  fidem  adversus  haereticos  defenderent.  Refert  Theodoritus,  quum  synodum  Nicenam  Constantinus  coegisset,  his  verbis  alloquutum  fuisse  episcopos:  Exstant  apostolici  libri  et  prophetarum  sanctiones,  quae  nos  erudiunt  quid  de  rebus  sacris  sentire  debeamus.  Posito  igitur  hostili  certamine,  ex  scriptis  divinitus  inspiratis  quaestionum  quaeramus  solutionem.  Cur  non  restiterunt  patres,  si  haec  non  erat  legitima  disputationis  series?  Imo  cur  libenter  obtemperarunt,  sicut  acta  concilii  testantur?  Quin  etiam  sponte  fuisse  facturos,  quod  admonebantur,  inde  aestimare  promptum  est,  quod  scripturis  ad  hoc  ipsum  instructi  et  comparati  venerant.  Cur  non  eorum  stultitiam  deridet  Pighius,  quod,  relicta  illa  certa  fidei  regula,  in  qua  figere  pedem  tuto  poterant,  in  vagum  illum  scripturae  labyrinthum  abripi  se  passi  fuerint?  Imo  cur  non  Augustinum  capitaliter  accusat,  cui  quum  ista  conditio  diceretur,  ut  eandem,  quae  inter  nos  agitatur,  quaestionem  superiorum  doctorum  scriptis  finiret,  acquiescere  noluit?  Nam  etsi  eorum  testimoniis  utitur,  et  sibi  non  esse  contrarios  ostendit,  controversiam  tamen  inde  iudicari  non  patitur,  sed  ad  scripturam  provocat.  Patent,  inquit,  libri  Dei:  non  avertamus  aspectum.  Clamat  scriptura:  adhibeamus  auditum.  Item,  de  libro  suo  loquens:  Ut  vobis  sit  fructuosissimus,  non  vos  pigeat  saepius  relegere,  ut  sciatis  quibus  et  qualibus  quaestionibus  solvendis  atque  sanandis  [pag.  61]  illic  non  humana,  sed  divina  valeat  autoritas,  a  qua  recedere  non  debemus,  si  volumus  pervenire  quo  tendimus.  Habet  nunc  Pighius  quocum  certet:  quem  ubi  debellaverit,  ad  nos  veniat  licet.  Quanquam  non  in  eam  partem  accipi  velim  quae  dico,  ac  si  ecclesiarum  consensui  nullum  in  definiendis  fidei  quaestionibus  locum  relinquerem.  Sed  hunc  scripturae  honorem  tribui  decet,  ut  ad  eius  examen  exigantur  omnia.  Quidquid  eius  autoritate  comprobatur,  non  vocetur  amplius  in  dubium:  rursum  nihil,  nisi  quod  cum  ea  convenit,  recipiatur;  quidquid  diversum  est,  sit  pro  damnato,  ut  ab  ea  sola  pendeant  et  in  ea  consistant  universae  fidei  definitiones.  Huic  dum  accedit  ecclesiarum  consensus,  non  parum  momenti  habet  ad  confirmationem.  Verum  hoc  diligenter  observandum  est  ne  ab  ea  disiungatur.  Ita  hoc  nobis  singularis  testimonii  instar  est,  ad  obsignandam  fidei  nostrae  certitudinem,  quod  hanc  ipsam  esse  scimus,  quam  pridem  omnes  ex  toto  orbe  sancti  a'mplexi  sunt,  in  qua  unanimes  perstiterunt  usque  ad  mortem,  pro  qua  etiam  tot  ex  ipsis  vincula,  exsilia,  deportationes,  lapicidinas,  ignominias  perpessi  sunt,  .sanguinem  denique  fude-