50:276  peut  mentir  a  parle  a  nous,  et  nous  a  revele  sa  volonte,  que  nous  demeurions  la  sans  en  estre  aucunement  divertis.  Or  cependant  pour  ce  que  le  diable  a  beaucoup  d'artifices  pour  nous  desbaucher,  et  mesmes  (comme  desia  nous  avons  dit)  qu'il  abusera  du  nom  de  Dieu  pour  s'insinuer,  et  pour  avoir  quelque  acces  a  nous:  que  nous  scachions  ce  qu'il  faut  attribuer  aux  hommes,  c'est  que  Dieu  cependant  demeure  en  son  degre,  et  que  nostre  Seigneur  luy  seul  ait  toute  maistrise  sur  nous  et  que  nostre  Seigneur  Iesus  ait  tousiours  ceste  preeminence,  sur  laquelle  nous  soyons  soustenus  ou  appuyez.  Car  si  nostre  foy  n'est  arrestee  en  la  pure  verite  de  Dieu  qui  n'est  point  variable,  il  est  certain  qu'il  n'y  aura  que  mensonge.  C'est  ce  que  nous  avons  a  recueillir  en  l'exemple  qui  nous  est  ici  propose  des  Galatiens.  Or  cependant  on  pourroit  trouver  estrange  comme  Sainct  Paul  use  d'une  si  grande  rigueur  contr'eux  (comme  nous  verrons  ci  apres),  attendu  que  la  il  n'estoit  point  question  de  renier  ouvertement  Dieu,  et  quitter  l'Evangile,  et  blasphemer  contre  nostre  Seigneur  Iesus  Christ  et  mettre  en  avant  quelque  idolatrie  qui  fust  toute  notoire,  mais  des  ceremonies  de  la  Loy.  Car  ceux  contre  lesquels  S.  Paul  combat  en  ceste  epistre,  n'avoyent  autre  chose  sinon  qu'il  faloit  observer  les  ceremonies  de  la  Loy  de  Moyse,  et  qu'on  y  estoit  tenu  sur  peine  de  peche  mortel.  Or  ici  de  prime  face  on  pouvoit  dire  que  leur  cause  estoit  favorable.  Car  ce  n'est  pas  comme  le  Pape  qui  a  forge  en  sa  tyrannie  beaucoup  de  statuts,  et  a  commande  ceci  et  cela,  mettant  les  poures  ames  en  servitude:  mais  on  disoit,  d'autant  que  la  Loy  n'estoit  point  des  hommes,  qu'il  la  faloit  garder,  car  Dieu  en  estoit  autheur.  Il  sembleroit  donc  que  sainct  Paul  n'eust  point  occasion  d'estre  ainsi  esmeu  contre  une  telle  opinion,  encores  qu'elle  ne  fust  pas  du  tout  vraye  ni  bonne.  Et  puis  il  y  a  encores  une  autre  raison,  qu'il  ne  faut  point  que  nous  debations  tant  des  choses  externes,  si  on  doit  observer  un  iour  ou  non,  si  on  ne  doit  point  manger  de  la  chair  de  pourceau,  aussi  bien  que  de  la  chair  de  mouton.  Car  quand  on  ne  fera  point  quelque  ceremonie,  ou  qu'on  le  fera,  est-ce  a  dire  que  la  Chrestiente  soit  du  tout  perdue  pour  cela?  Or  neantmoins  c'est  tout  le  debat  qu'a  S.  Paul:  voire  et  cependant  il  crie  que  les  Galatiens  se  sont  revoltez,  qu'ils  ont  abandonne  nostre  Seigneur  Iesus  Christ,  qu'ils  sont  apostats.  On  pourroit  dire  qu'il  use  d'une  vehemence  par  trop  excessive:  mais  en  ceci  nous  sommes  encores  admonestez  que  le  diable  quelque  fois  trouvera  des  petites  subtilitez  pour  nous  aliener  de  l'Evangile  sans  que  nous  y  pensions.  Et  d'autant  plus  faut-il  que  nous  soyons  bien  advisez:  car  de  nostre  coste  nous  ne  le  serons  pas,  comme  a  la