41:276  nempe  pudoris  causa.  Scimus  quid  dixerit  Cato  de  aruspicibus;  Miror  quum  alius  alium  adspicit,  cur  non  rideat.  Dicebat  esse  mera  ludibria.  Si  quis  Catonem  interrogasset  vel  in  senatu,  vel  privatim,  quid  tu  censes  de  aruspicibus,  et  tota  religione  nostra?  Ah  potius  pereat  totus  mundus,  quam  aruspices:  nam  his  constat  salus  populi,  et  totius  reipublicae,  et  hos  accepimus  a  maioribus.  Illos  igitur  perpetuo  retineamus.  Ita  loquutus  fuisset  nebulo  ille,  ita  etiam  omnes  alii.  Sed  inter  se  dum  garriebant,  nihil  eos  pudebat  negare  omne  numen,  et  ita  etiam  sugillare  quidquid  creditum  ab  initio  fuerat,  ut  prorsus  in  nihilum  redigerent  quidquid  a  maioribus  suis  acceperant.  Non  mirum  igitur  est,  si  angelus  hic  vocet  alienum  deum,  qui  non  fuit  Romae  cultus,  ut  iam  dictum  est,  superstitionis  causa,  vel  per  errorem,  sed  tantum  ut  ne  ipsorum  barbaries  esset  abominabilis  toti  mundo.  Deum  igitur  illum,  inquit,  quem  agnoverit.  In  hac  etiam  voce  magnum  subest  pondus.  Non  significat  angelus  totum  illud  numen  fundatum  esse  in  opinione  et  arbitrio  illius  regis,  hoc  est,  quoniam  ipsis  ita  placuit,  idque  respectu  utilitatis  privatae.  Quoniam  igitur  consilium  probabitur  colendi  aliquos  deos,  ideo  cum  suis  placitis  sese  efferent  ac  iactabunt  magna  confidentia,  nusquam  esse  pietatem  nisi  Romae.  Sed  unde  id  ?  Nempe  quia  agnoscent  illos  deos,  hoc  est,  statuent  ac  decernent  servandam  esse  talem  formam.  Hic  totam  Romanorum  religionem  angelus  ponit  in  libidine,  et  ostendit  interea  fore  impuros  Dei  contemptores.  Postea  dicit  Multiplicabit  gloriam.  Hoc  potest  referri  ad  Deum,  sed  mihi  magis  probatur  diversa  interpretatio,  nempe  quod  magnas  opes  sibi  cogerent  Romani,  et  crescent  mirabiliter  tam  opulentia,  quam  amplitudine  imperii  et  aliis  omnibus  praesidiis.  Ergo  multiplicabunt  gloriam,  hoc  est,  acquirent  subinde  novas  ditiones,  et  augebunt  suam  potentiam,  cumulabunt  etiam  multiplices  thesauros.  Nam  haec  expositio  bene  contexitur  cum  fine  versus,  ubi  adiungit,  dominari  ipsos  faciet  late.  Haec  pars  est  gloriae,  quam  sibi  coacervaturus  erat  rex  iste,  nempe  quoniam  praeficiet  reges  magnis  terris,  deinde  distribuet  quasi  praedam  quidquid  acquisierit,  idque  pretio.  Dicit  ergo,  dominari  ipsos  (est  relativum  sine  subiecto,  ut  loquuntur:  et  haec  ratio  satis  trita  est  Hebraeis)  Dominari  ergo  faciet  ipsos  in  multis.  Quos  dominari  faciet  rex  romanus,  hoc  est,  imperium  ipsum  romanum?  Nempe  si  quis  operam  illis  impenderit,  mercedem  referet  ex  alieno,  quemadmodum  scimus  Eumenem  fuisse  ditatum  praeda  et  spoliis  Antiochi.  Scimus  fuisse  distributas  provincias  pro  ipsorum  arbitrio.  Rhodiis  data  fuit  haec  insula,  alteri  vero  regnum  ablatum  est:  Aetoli  ampliarunt  suam  ditionem.  Ut  ergo  quisque  graviter  laboraverat,  et  fecerat  largos  sumptus,  ita  etiam  singulos  ditarunt