9:275  275  RESPONSIO  ALTERA  276  XI.  Deus  velle  dat  operantibus  mala,  etiam  suggerit  pravos  affectus  et  inhonestos,  non  solum  permissive,  sed  efficaciter,  idque  propter  suam  gloriam.  XII.  Impii  in  impietate  potius  opus  Dei  quam  suum  faciunt.  XIII.  Necessario  peccamus  ex  sensu  Dei,  quum  ex  nostro,  sive  fortuito,  peccamus.  XIV.  Quae  prava  sua  voluntate  perpetrant  homines,  illa  etiam  procedunt  a  voluntate  Dei.  ET  HI  QUIDEM  SUNT  ARTICULI  ITEM,  QUAE  CONTRA  DICANTUR  ACCIPE.  CONTRA  PRIMUM.  [pag.  7]  Primum  articulum  dicunt  esse  contra  naturam,  et  contra  scripturam.  De  natura  sic  dicunt:  Omne  animal  naturaliter  amat  suum  foetum.  Atqui  haec  natura  est  a  Deo:  ex  quo  consequitur,  ut  Deus  amet  suum  foetum.  Neque  enim  efficeret  ut  animalia  amarent  suos  foetus,  nisi  amaret  ipse  quoque  suos.  Atque  hoc  probant  hac  ratione:  Dixit  Dominus  :  Egone  parere  faciam,  et  non  pariam?  Quasi  hoc  dicat:  Quod  ego  facio  facere  alios,  idem  ipse  quoque  facio.  Atqui  facio  parere  alios:  ergo  ego  quoque  pariam.  Hinc  a  simili  ducunt  argumentum:  Deus  facit  animalia  amare  foetus  suos:  ergo  amat  ipse  suos.  Atqui  sunt  omnes  homines  foetus  Dei.  Deus  enim  est  pater  Adami,  a  quo  omnes  homines  nati  sunt:  ergo  amat  omnes  homines.  Atqui  creare  ad  perditionem  non  est  amoris,  sed  odii:  ergo  non  creavit  quemquam  ad  perditionem.  Item:  Creare  est  opus  amoris,  non  odii:  ergo  Deus  omnes  homines  creavit  amore,  non  odio.  Item:  Nulla  tam  immanis  bestia  est  (nedum  homo)  quae  velit  creare  pullum  ad  miseriam:  quanto  minus  Deus.  Nonne  esset  vel  lupo  deterior?  Sic  argumentatur  Christus:  Si  vos,  quamvis  mali,  tamen  nostis  bona  dona  dare  filiis  vestris,  quantum  magis  Deus?  Sic  et  tui  adversarii  argumentantur:  Si  Calvinus,  quamvis  malus,  tamen  nollet  gignere  filium  ad  miseriam,  quanto  minus  Deus?  Haec  et  talia  dicunt  de  natura.  De  scriptura  autem  sic  dicunt:  Deus  vidit  omnia  quae  fecerat  esse  valde  bona  :  ergo  erat  homo  quem  fecerat  valde  bonus.  Quod  si  eum  creaverat  ad  perniciem,  creaverat  bonum  ad  perniciem,  et  amat  perdere  bonum:  id  quod  vel  cogitatu  [pag.  8]  impium  est.  Item:  Deus  creavit  unum  hominem  ut  eum  collocaret