6:275  RESPONSIO  CONTRA  PIGHIUM  Irenaeo  cum  improbissimis  haereticis,  qui  nihilo  plus  scripturae  autoritate  moverentur,  quam  universae  ecclesiae  consensu.  Itaque  conqueritur,  nihil  posse  proferri,  quod  non  eludant.  Neque  enim  lubricis  tergiversationibus  elabi  quidquam  illis  curae  erat,  sed  impudenter  respuebant,  quidquid  obiiceretur.  Si  convincerentur  scripturis,  sapientiam  habere  se  dicebant  apostolis  [pag.  59]  altiorem  et  perfectiorem.  Si  ad  ecclesiae  consensum  revocarentur,  dicebant  non  mirum  esse,  si  ecclesia  puram  doctrinam  non  servaret,  quae  corruptam  et  fermento  vitiatam  non  tantum  a  discipulis,  sed  a  Domino  quoque  acceperat.  Quid  ad  haec  Irenaeus?  1)  Non  per  alios,  inquit,  habemus  salutis  nostrae  dispositionem,  quam  per  apostolos:  qui,  quod  voce  promulgarunt,  postea  scripto  nobis  tradiderunt,  fundamentum  et  columnam  fidei  nostrae  futurum.  Postea  hanc  quoque  alteram  partem  urget,  quod  fidei  unitatem,  in  scripturis  fundatam,  colerent  ecclesiae  omnes,  ab  apostolis  edoctae  et  institutae.  Sed  illud  semper  nihilominus  retinet,  scripturam  perfectae  et  absolutae  sapientiae  scholam  esse.  Tertullianus  de  praescriptione  veritatis  scribit  contra  haereticos:  quia  et  ipsorum  petulantiam  videbat  nullo  modo  posse  coerceri,  quin  centies  victi,  adhuc  litigarent:  et  hoc  optimum  esse  adminiculum  censebat  confirmandae  veritati,  si  eam  constaret  ab  ipsis  apostolis  fluxisse:  contra  vero  fortem  et  validam  machinam  ad  diruenda  haereticorum  mendacia,  si  ostenderentur  aliquid  in  apostolorum  doctrina  novare.  Quanquam  autem  in  probabili  alias  et  iusta  causa,  fervore  disputationis  ultra  iustas  metas  nonnihil  provehitur,  non  tamen  aliud  consilium  habet,  nisi  ut  doctrinam  certo  scripturis  proditam,  apud  simplices  et  infirmos  hac  quoque  nota  confirmet,  quod  eam  viva  quoque  voce  apostoli  per  manus  tradidissent.  Ad  scripturas  provocandum  negat,  quoniam  in  illis,  aut  incerta,  aut  parum  certa  sit  victoria.2)  Sed  quid  ipse  tot  libris  facit?  Quibus  armis  utitur  adversus  Marcionem,  Praxeam,  Hermogenem  et  alios,  nisi  simplici  verbo  Dei?  Quid  igitur?  An  parum  bene  sibi  constat?  Sed  iam  citaverat  locum  apostoli,  ubi  vetat  cum  haeretico  homine,  post  unam  aut  alteram  admonitionem,  amplius  disceptare  (Tit.  3,  10).  Non  dubium  igitur,  quin  illuc  respiciat,  quum  negat  agitandas  de  fide  contentiones  ex  scripturis.  Nobis,  [pag.  60]  inquit,  curiositate  opus  non  est,  post  Christum  Iesum,  nec  inquisitione,  post  evangelium.  In  summa,  tantum  vult  concertationibus  finem  imponi,  quae  et  astutiam  acuant  haereticorum,  ut  sint  ad  pugnam  instructiores,  et  pervicaciam  augeant,  et  infirmas  conscientias  exagitent,  1)  Libr.  3.  adv.  haereses  cap.  1.  2)  Tertull,  de  praescript.  c.  14  seqq.