50:274  nous  admoneste  de  recourir  a  luy,  a  fin  que  nous  le  prions  qu'il  nous  fortifie  tellement  que  nous  persistions  iusques  en  la  fin?  Ce  que  nous  ne  pourrions  pas  faire,  sinon  que  nous  fussions  soustenus  de  luy.  Voila  donc  comme  les  vices  qui  sont  ici  declarez  par  S.  Paul  en  ce  peuple  de  Galatie  nous  doivent  servir  d'instruction.  Car  c'est  autant  comme  si  Dieu  nous  monstroit  en  la  personne  de  ces  gens-la,  quelle  seroit  nostre  constance,  sinon  qu'elle  nous  fust  donnee  de  luy.  Combien  donc  que  nous  ayons  este  fidelement  enseignez  en  l'Evangile,  si  faut-il  que  Dieu  besongne  de  iour  en  iour:  ou  autrement  il  y  aura  une  telle  legerete  que  nous  serons  transportez  bien  tost,  et  pour  la  moindre  occasion  du  monde.  Et  au  reste  (comme  i'ay  desia  dit)  Satan  est  ua  ennemi  terrible.  Et  ainsi  il  ne  faut  point  que  nous  soyons  nonchalans,  veu  qu'il  est  tousiours  au  guet,  et  qu'il  cerche  de  nous  envahir  de  tous  costez,  et  qu'il  ne  luy  faut  qu'un  petit  pertuis,  qu'incontinent  il  trouvera  entree.  Il  ne  semblera  pas  que  la  porte  luy  soit  ouverte:  mais  nous  pourrons  estre  surprins  devant  que  d'y  avoir  pense.  Pour  ceste  cause  notons  bien  cest  advertissement  que  Dieu  nous  donne  en  ce  passage,  et  en  faisons  bien  nostre  profit.  Et  d'autre  coste  nous  voyons  comme  de  tout  temps  le  diable  s'est  servi  du  nom  de  Dieu,  et  en  a  fait  une  fausse  couverture  pour  desguiser  la  verite,  et  la  convertir  en  mensonge:  ou  bien  pour  mettre  quelque  discord,  tellement  que  petit  a  petit  l'Evangile  s'escoulast.  Les  Apostres,  comme  ils  avoyent  este  eleus  de  nostre  Seigneur  Iesus  Christ  pour  porter  et  publier  son  Evangile  par  tout  le  monde,  estoyent  bien  dignes  qu'on  leur  portast  reverence  par  tout,  et  que  leur  renom  eust  telle  authorite  qu'on  receust  ce  qui  estoit  procede  d'eux.  Car  leur  vocation  estoit  authentique:  on  scavoit  qu'ils  ne  s'estoyent  point  ingerez  d'eux-mesmes,  mais  que  le  Fils  de  Dieu  les  avoit  eleus  et  ordonnez  de  sa  propre  bouche,  et  mesmes  qu'il  les  avoit  fait  comme  creatures  nouvelles:  poures  idiots  et  gens  ignorans  avoyent  este  changez  en  telle  sorte;  qu'on  voyait  bien  que  leur  doctrine  ne  venoit  sinon  d'un  miracle  celeste.  Car  ils  n'avoyent  rien  apprins  sinon  en  l'eschole  de  Dieu:  et  en  une  minute  de  temps,  il  les  avoit  tellement  douez  18