25:274  pseudoprophetam  exercuit  iudicium.  Poterat  statim  angeli  verbis  ipsum  castigare  :  sed  quia  absque  gravi  ignominia  non  satis  severa  fuisset  obiurgatio,  bestiam  ei  constituit  magistram.  Accedit  quidem  postea  vox  angeli:  sed  quia  tam  indocilis  fuerat,  pro  merito  tractatur,  ut  quum  profecerit  in  schola  asinae,  Deum  audire  incipiat.  Porro  asina  ipsum  hebetem  esse  et  mente  captum  inde  coarguit,  quia  re  insolita  non  fuerit  expergefactus.  Negat  enim  se  prius  fuisse  refractariam.  Ergo  si  qua  in  misero  scintilla  intelligentiae  fuisset,  reputare  debuit  quidnam  sibi  vellet  illa  novitas  et  subita  mutatio.  Sic  a  veterno  expergefactus  fuit,  quo  attentius  loquentem  deinde  angelum  audiret.  31.  Detexit  Iehova  oculos  Balaam.  Docet  hic  locus,  quidquid  est  in  sensibus  nostris  vigoris  non  modo  nobis  divinitus  esse  inditum,  sed  arcano  eius  instinctu  vel  foveri  vel  exstingui.  Aperti  sunt  oculi  Balaam:  ergo  ante  oppositum  erat  velamen,  ne  rem  manifestam  cerneret.  Sic  Deus  pro  suo  arbitrio  hebetat  qui  videntur  sibi  valde  acuti:  sicuti  perspicientia  est  singulare  eius  donum.  Caeterum  in  hoc  exemplo  tanquam  in  speculo  nobis  ostenditur  quomodo  Deum  timeant  hypocritae,  nempe  dum  urgentur  eius  praesentia:  quia  simul  ac  possunt  se  subducere,  tanquam  servi  fugitivi  lasciviunt.  Vidit  Balaam  angelum  districto  gladio  minitantem,  demisso  capite  adoravit:  nempe  quia  instabat  Dei  ultio.  Sed  hic  metus  eum  ad  veram  correctionem  minime  adduxit.  Fatetur  quidem  se  peccasse,  et  poenitentiae  aliquem  fructum  profert,  dum  paratus  est  domum  redire:  atqui  servilem  et  coactum  metum  prodit:  quod  nonnisi  ad  poenam  expavescat.  Nescivi,  inquit,  te  stare  in  via.  Ergo  nisi  armatus  fuisset  angelus  ad  vindictam,  secure  quasi  data  impunitate  pergebat.  Alio  etiam  verbo  detegitur  eius  vafrities  et  perfidia.  Cursum  retroagere  paratus  est,  si  Deum  offendat  profectio:  quasi  vero  non  ante  intellexisset  minime  Deo  placere.  Ridicula  est  igitur  conditio,  quasi  de  re  satis  testata  ambigeret.  Si  serio  Deum  timebat,  et  puro  animi  affectu,  simpliciter  expeditioni  male  et  perperam  susceptae  renunciare  debebat.  Quorsum  enim  attinet  dicere:  Peccavi,  si  putat  Deo  adverso  se  persequi  inceptum  iter  posse?  Ergo  discamus,  ubi  innotuit  Dei  voluntas,  nullas  moras  oblique  tergiversando  nectere.  Quod  dicit  angelus:  Nisi  deflexisset  asina,  se  illa  intacta  interfecturum  fuisse  Balaam,  his  verbis  significat,  non  modo  innoxio  animali  se  fuisse  parsurum  pro  Dei  aequitate  et  clementia,  sed  ipso  bestiae  sensu,  ac  si  iram  Dei  deprecaretur,  redemptam  fuisse  domini  vitam,  qui  alioqui  misericordia  indignus  erat.  35.  Angelus  vero  Iehovae.  Iterum  ironice  conceditur  impio  homini  quod  sine  scelere  exsequi  non  poterat.  Verum  sicuti  ante  dixi  adeo  sibi  conscius  18