5:273  DE  FUGIENDIS  IMPIORUM  SACRIS.  apostolo  ad  tempus  licuit,  Iudaeis  se  Iudaeum  praebere,  quo  Iudaeos  lucrifaceret.  Eadem  si  foret  missarii  sacrificii  ratio,  quae  fuit  eius  oblationis:  si  idem  [pag.  39]  ipsis  consilium  esset,  quod  apostolo  fuisse  constat,  ego  sano  et  tam  benignam  adversus  infirmos  fratres  mansuetudinem  exoscularer,  et  eos  exhortarer  ad  pergendum.  Verum  quantum  insit  in  missa  flagitii,  planum  a  me  factum  esse  confido.  Quid  animi  habeant,  ipsi  sibi  locupletissimi  sunt  coram  Deo  testes.  Quod  vero  illis  postremum  suffugium  est,  quam  vanum  sit  ac  frivolum  cavillum,  satis  fuerit  uno  verbo  indicare.  Plurimos  esse  bonos  viros  Deique  timentes,  obiiciunt,  qui  nulla  veri  cognitione  adhuc  imbuti,  missam  habeant  sacrosanctam:  esse  quoque  in  fratribus  non  pessime  alioqui  verbo  Dei  edoctos,  quibus  nondum  tamen  persuasum  sit,  quanta  sit  exsecratione  referta.  Eius  itaque  contemptum  si  coram  ipsis  prae  se  ferant,  maximas  utrinque  offensiones  imminere  causantur,  quibus  occurrere,  christianae  sit  modestiae  ac  mansuetudinis.  Bene  istud  quidem  et  prudenter,  si  esset  hoc  scandalis  obviam  ire,  sic  cavere  ne  in  te  incurrant  hominum  offensiones,  ut  simul  eorum  pedibus  scandala  instruas,  quibus  in  Christum  ipsum  impingant.  Et  quid  aliud  agunt,  dum  operam  dant,  ne  missae  contemptu  vel  prorsus  indoctos,  vel  nondum  plane  confirmatos  offendant?  Nam  illorum  quidem  offensionem  a  se  amoliuntur:  sed  ad  Deum  offendendum  exemplo  suo  eos  illectant.  At  non  ita  nos  instituit  Dominus,  qui  vult  profecto  nos  omnibus  placere,  non  tamen  nisi  in  bonum  :  qui  praecipit,  ut  infirmis  nos  accommodemus,  at  in  aedificationem  (Rom.  15,  1.  2):  quam  minime  omnium  sectantur,  qui  eorum  simplicitatem  perniciosissimo  errore,  quo  illaqueatam  ipsam  vident,  fortius  adhuc  constringunt.  Hinc  porro  accidit,  ut  dum  omnes  scandali  conscientia  deterreri  se  fingunt,  re  vera  hominum  adversum  se  indignationem  reformidant,  nemo  sincera  integraque  puritate  praeire  unquam  aliis  incipiat.  Quid  enim  causae  esse  putemus,  quod  e  tanta  multitudine  nemo  in  hac  parte  expergiscitur,  nisi  quia,  dum  ita  alter  alterum  intuetur,  ad  Deum  oculos  nemo  dirigit?  ac  dum  unusquisque  quid  alii  praestent  expendit,  iusta  regula,  hoc  est,  Dei  verbo,  modum  officii  nemo  metitur?  Et  quum  in  hunc  modum  ipsi  sibi  mutuo  laqueos  nectant,  scandalorum  mentionem  facere  audent:  quae  aut  nulla,  aut  quam  minima  essent,  nisi  in  plana  expeditaque  via  ab  ipsis  obiicerentur.  Nunc  ut  ad  te,  suavissime  frater,  sese  oratio  nostra  referat:  quanquam  certe  ipse  per  te  iam  intelligis  quid  consilii  tibi  restet,  ubi  perspectum  habes,  quo  te  ducat  verbi  Dei  linea  (ad  quam  deliberationes  omnes  tuas  [pag.  40]  conformari  limitarique  decet)  ne  qua  tamen  in  parte  tantis  desim  tuis  angustiis,  quam  a  me  tibi  perscribi  officii  formulam  literae  tuae  flagitant,  eam  quam  potero  brevissime  Calvini  opera.  Vol.  V.