6:272  Atque  istud  sane  perquam  est  ridiculum,  quod  dum,  ob  dubios  et  obscuros  scripturae  sensus,  ad  ecclesiae  definitionem  vult  nos  trahere,  principium  suum  ex  scripturis  sumit.  Atqui  principia  αὐτόπιστα  esse  oportet:  quae  res  summam  claritatem  requirit.  Scriptum  est,  inquit,  surgent  pseudoprophetae,  et  seducent  multos  in  nomine  meo.  Quid  sibi  vult  in  nomine  Christi?  Falsa  scripturarum  interpretatione.  Quid  si  negem?  Non  enim  unus  est  fallendi  modus  in  Christi  nomine.  Sed  valeat  hoc.  Sequitur:  Quid  est  seducere?  Seorsum  ducere  ab  unitate  corporis.  Imo  quod  dicit  Pighius,  est  seorsum  ire.  Christus  enim  dicit  πλανήσουσι,  quod  fallere  et  decipere  significat.  Hic  autem  in  etymologia  verbi,  quo  nunquam  usus  est  Christus,  pueriliter  philosophatur.  Nihil  mirum  si  tam  dubiae  sunt  scripturae  Pighio,  qui  tam  profana  [pag.  55]  audacia  in  illis  ludit  ac  lascivit.  Sed  hoc  extremae  improbitatis  est,  quod  sua  commenta,  tam  frivola  et  nugatoria,  pro  genuino  scripturae  sensu  tam  audacter  ingerere,  idque  loco  principii,  nihil  eum  pudet.  Sed  pergamus  in  hac  bella  expositione.  Desertum,  angulos,  penetralia,  allegorico  sensu,  novas  et  singulares  opiniones,  a  communi  illius  corporis  sensu  extraneas,  intelligit.  Sed  quid  bi  Christus  ipse  aliter  apud  Lucam?  Non  veniet,  inquit,  regnum  Dei  cum  observatione;  neque  dicent:  ecce  hic,  aut,  ecce  illic.  Ecce  enim  regnum  Dei  intra  vos  est  (Luc.  17,  20).  Eandem  historiam  licet  non  iisdem  verbis,  duo  evangelistae  referunt.  Allegoricum  sensum  comminiscitur  Pighius  in  verbis  Matthaei:  dico  nullum  esse  magis  fidum  interpretem  ipso  Christo,  qui  apud  Lucam,  sine  ullis  figuris,  se  nihil  aliud  velle  testatur,  quam  regnum  Dei  spirituale  esse:  ideoque  commentitiis  observationibus  non  alligandum.  Interea,  inquit,  dum  veniam  ad  iudicium,  regnabit  in  vobis  Deus  spiritualiter:  regnabit  in  conscientiis  vestris,  per  iustitiam,  veritatem,  pacem,  fortitudinem  spiritus,  non  secundum  externum  mundi  apparatum.  Ego  autem  quum  veniam,  instar  fulguris  subito,  praeter  spem  omnium,  emergam.  Et  sicut  fulgur  ab  oriente  exit,  et  apparet  usque  in  occidentem,  ita  momento  uno,  in  ictu  oculi,  simul  manifestabor,  tribunal  conscendam,  totum  mundum  advocabo.  Non  est  igitur  quod  in  his  tam  claris  et  simplicibus  verbis  penetralia  et  latebras  allegoriarum  quaeritet  Pighius.  Sed  audiamus  acutam  conclusionem.  Ergo,  inquit,  monet  Christus,  ne  exeamus.  Unde?  Ab  illo  corpore.  Et  ne  quis  obtendat,  se  nescire  ubi  sit  corpus  illud,  evidens  et  infallibile  signum  mox  proponit.  Ubi  erit  corpus,  illuc  aquilae  congregabuntur.  Quae  sunt  aquilae?  Nempe  de  quibus  propheta  meminit:  qui  corpore  onusti  pennis  tamen  adiutricis  gratiae  in  sublime  feruntur.  Ubicunque  congregantur  illae  aquilae,  illic  esse  corpus,  cui  associari  et  [pag.  56]  consentire  debeas,  ne  dubita.