51:272  donc,  en  ce  passage,  quand  il  est  dit  que  Dieu  a  eleu  les  siens  pour  les  faire  cheminer  en  sainctete  de  vie,  ce  n'est  pas  qu'il  soit  oblige  de  les  gouverner  par  son  sainct  Esprit  des  leur  enfance.  Car  (comme  i'ay  dit)  l'experience  monstre  qu'il  les  laisse  esgarer  iusques  a  ce  que  le  temps  opportun  soit  venu  qu'il  les  appelle.  Mais  tant  y  a  qu'il  nous  faut  tousiours  retenir,  quand  Dieu  nous  a  eleus,  que  c'a  este  pour  nous  appeler  a  sainctete  de  vie.  Car  s'il  nous  laissoit  comme  les  povres  reprouvez,  il  est  certain  que  nous  ne  pourrions  faire  que  tout  mai,  selon  la  corruption  qui  est  en  nous.  Le  bien  donc  procedera  de  sa  misericorde  gratuite,  de  laquelle  il  a  desia  use  envers  nous  devant  que  nous  fussions  nais  et  devant  que  le  monde  fust  cree.  Voila  en  somme  ce  que  nous  avons  a  retenir  de  ce  passage.  Et  ainsi  les  blasphemes  de  ceux  qui  veulent  obscurcir  la  louange  de  Dieu  sont  reprimez:  d'autant  qu'ils  mettent  un  combat  et  comme  un  divorce  entre  l'election  gratuite  de  Dieu,  et  l'affection  de  bien  vivre.  Voire?  (disent-ils)  si  Dieu  nous  a  eleus,  que  chacun  face  tout  ce  que  bon  luy  semblera,  car  nous  ne  pouvons  perir.  Et  que  nous  doit-il  chaloir  d'avoir  nul  soin  de  bien  et  de  mal,  puis  que  nostre  salut  est  fonde  en  la  pure  grace  de  Dieu,  et  non  pas  en  nulle  vertu  ?  La  response  est  aisee  a  cela,  que  s'il  n'y  avoit  nulle  election  de  Dieu,  autant  qu'il  a  de  pensees  et  d'appetis  en  nous,  ce  seroyent  autant  de  rebellions  contre  toute  droiture:  car  nous  tendons  tous  a  mal,  et  non  seulement  y  sommes  enclins,  mais  nous  y  sommes  comme  bouillans  et  y  courons  avec  une  impetuosite  enragee,  d'autant  que  le  diable  possede  tous  ceux  qui  ne  sont  point  reformez  par  l'Esprit  de  Dieu.  Et  ainsi  il  faut  conclure  que  ce  que  nous  sommes  adonnez  a  bien  faire,  c'est  d'autant  que  Dieu  nous  y  conduit  et  gouverne  par  son  sainct  Esprit,  et  le  tout  a  cause  de  son  election.  Il  ne  faut  point  donc  (comme  i'ay  desia  dit)  separer  ce  que  Dieu  a  conioint  :  car  nous  ne  sommes  pas  eleus  pour  nous  donner  toute  licence,  mais  c'est  a  fin  que  par  effect  nous  monstrions  que  Dieu  nous  a  adoptez  pour  ses  enfans,  et  qu'aussi  il  nous  a  prins  en  sa  charge,  a  fin  d'habiter  en  nous  par  son  sainct  Esprit,  et  de  nous  unir  a  soy  en  toute  perfection  de  iustice.  Cependant  notons  aussi,  encores  que  Dieu  nous  ait  reformez  et  qu'il  nous  ait  mis  au  bon  chemin,  et  que  desia  nous  sentions  qu'il  a  besongne  en  nous  pour  nous  assuietir  a  sa  Parole  et  le  servir  en  toute  obeissance,  ce  n'est  pas  pourtant  que  nous  soyons  pleinement  reformez  du  premier  iour,  ni  mesmes  en  toute  nostre  vie.  Sainct  Paul  ne  dit  pas  que  Dieu  amene  au  but  de  perfection  ses  eleus  et  fideles,  mais  il  dit  qu'il  les  y  attire.  Cependant  nous  sommes  au  chemin  iusques  a  la  mort.  Ainsi  conversans  en  ce  monde,  apprenons  de