41:272  sensu  deitatis,  et  simulasse  religionem.  Profanae  aliae  gentes  quamvis  in  tenebris  errarent,  superstitiose  tamen  colebant  aliquos  deos.  In  Romanis  autem  non  fuit  error,  neque  inscitia,  sed  crassus  Dei  contemptus,  simul  tamen  aliqua  pietatis  simulatio.  Hoc  colligitur  ex  omnibus  eorum  rebus  gestis.  Nam  tametsi  sibi  accersiverint  hinc  inde  complures  deos,  et  promiscue  coluerint  cum  aliis  gentibus  Minervam,  Apollinem,  Mercurium  et  alios  similes,  tamen  videmus  ut  pro  nihilo  duxerint  omnes  alios  cultus.  Iovem  coluerunt  ut  summum  Deum.  Iupiter  in  patria  sua  quid  illis  erat?  An  unius  oboli  fecerunt  Iovem  Olympium?  Imo  secure  ipsum  riserunt  cum  suis  cultoribus.  Quid  ergo  illis  fuit  Iupiter?  Nempe  gloria  Capitolii,  et  sine  illo  epitheto  nullus  illis  erat  Iupiter.  Iupiter  Capitolinus,  hoc  est,  Iupiter  quem  nobis  tenemus  quodammodo  devinctum.  Et  ideo  propheta  vocat  deum  Maozim,  hoc  est,  Deum  potentiarum.  Neque  enim  unquam  persuasi  fuerunt  Romani  aliquem  esse  Iovem  dignum  cultu,  vel  aliquam  esse  Iunonem,  sed  quia  freti  suis  opibus  putabant  se  esse  plus  quam  deos,  ideo  sumpserunt  sibi  Iovem  unum:  et  quoniam  sedes  eius  in  Capitolio  illis  erat  plus  quam  centum  Ioves  coelestes,  quoniam  affixerant  sua  superbia  totam  Dei  virtutem  suo  Capitolio.  Putabant  enim  se  esse  extra  omnem  aleam.  Et  hinc  etiam  illa  audacia,  quod  quisque  potuit  novos  deos  fabricare  suo  arbitrio.  Templum  fuit  dicatum  Fortunae  equestri.  Sic  enim  placuit  duci,  qui  usus  fuerat  strenua  opera  suorum  equitum,  ac  si  essent  adepti  victoriam:  et  Fortunae  equestri  templum  exstruendo  se  potius  voluit  deum  censeri.  Deinde  Iupiter  Stator  sit  deus.  Quare?  Ita  enim  placuit  alteri,  et  Roma  plena  fuit  talibus  templis.  Unus  imaginatus  est  Fortunam,  alius  Virtutem,  alius  Prudentiam,  alius  nescio  quid:  denique  quisque  ausus  est  ingerere  propria  commenta,  et  totidem  deos  Roma  coluit.  Hinc  etiam  factum  est,  ut  fuerit  apud  ipsos  factus  deus  Romulus.  Et  quo  iure  eum  deificaverunt  ?  Si  quis  excipiat  idem  etiam  aliis  populis  contigisse,  verum  quidem  est,  sed  in  stulta  et  bruta  adhuc  et  rudi  vetustate,  ut  satis  notum  est.  Romani  autem,  quemadmodum  iam  dixi,  non  errore,  neque  superstitione  finxerunt  sibi  deos,  sed  temulenta  illa  arrogantia,  quamvis  se  in  primo  gradu  statuerent,  et  sibi  iam  viderentur  superiores  esse  diis  omnibus,  quin  etiam  passi  sunt  templum  sibi  exstrui  in  Asia,  et  sacrificia  offerri,  et  libenter  nomen  dei  retinuissent.  Qualis  est  illa  superbia?  An  hoc  est  credere  esse  aliquem  deum,  vel  aliquos  deos?  Roma  est  dea,  et  dea  quae  prae  aliis  omnibus  sancte  colenda  est.  Videmus  ergo  non  frustra  hoc  dictum  esse  de  Romanis,  quod  coluerunt  deum  unum  fortitudinum,  hoc  est,  quod  sibi  ipsis  arrogaverint  deitatem,  et  tantundem  concesserint  diis  suis,  quantum  putabant  commodis  suis  fore  utile,  et  ut