6:271  RESPONSIO  CONTRA  PIGHIUM  (Rom.  10,  17).  Sic  enim  loquendo,  non  modo  veram  et  certam,  sed  unicam  facit  regulam  fidei.  Verum  ubi  cum  haereticis  est  certamen,  non  multum,  inquit,  cum  scriptura  proficias:  quam  totam  illis  promptum  est  eludere.  Iterum  mihi  respondeat,  quid  mutationis  acciderit,  ex  quo  Paulus  verbum  Dei  gladium  spiritualem  vocabat,  quo  totus  Satan  opprimeretur  (Ephes.  6,  17).  Si  adversus  haereticorum  omnium  caput  gladius  est  victor  ac  triumphalis,  qui  fit,  ut  adversus  membra  retusum  sit,  et  quasi  arundineum  telum?  Et  ubi  erit  vis  illa  penetrandi,  quae  illi  alibi  tribuitur,  ut  pertingat  usque  ad  divisionem  animae  et  spiritus,  discernat  cogitationes  cordis,  ete  (Hebr.  4,  12)?  Respondeat  etiamnum  mihi  Pighius,  perpetuumne  sit  elogium  hoc,  an  unius  tantum  aetatis:  omnis  scriptura  divinitus  inspirata,  utilis  est  ad  docendum,  ad  redarguendum,  ad  corrigendum,  ad  instituendum,  ut  integer  sit  homo  Dei  (2  Tim.  3,  16).  Hic  etiam  caput  movebit:  quasi  non  providerit  spiritus  sanctus,  qualis  futura  esset  haereticorum  vafrities  in  torquendis  ac  depravandis  scripturis.  Verum  cui  persuadeat  se  Deo  sapientiorem  esse?  Quod  si  nunc  quoque  negare  pergat,  sufficere  scripturam  ad  haereticos  arguendos,  quid  aliud  superest,  quam  cum  anathemate  illum,  tanquam  professum  et  pertinacem  veritatis  hostem  ablegare?  Nec  aliud  eo  loco  profert  Paulus,  quam  quod  usu  ipso  didicerat.  Nam  quum  adversus  Iudaeos,  quamlibet  duros  et  pervicaces,  disputaret,  non  aliunde  sumebat  arma,  si  verum  refert  Lucas  (Act.  17,  2).  Denique  ubi  diu  multumque  fuerit  disputatum,  hic  est  lapis  lydius,  ad  cuius  examen  exigendae  sunt  omnes  doctrinae.  Laudat  enim  spiritus  [pag.  54]  sanctus  Thessalonicenses,  qui  quum  recepissent  cum  omni  promptitudine  verbum,  investigabant  ex  scripturis,  an  haec  ita  se  haberent  (ibid.  vers.  l  l  )  .  Certe  aut  non  est  legitimum  scripturae  examen  ad  probandas  doctrinas,  aut  certa  perspicuaque  inde  fidei  definitio  haberi  potest.  Praeclare  Augustinus,  ubi,  inquit,  de  re  obscura  disputatur,  non  adiuvantibus  divinarum  scripturarum  certis  clarisque  documentis,  cohibere  se  debet  humana  praesumptio,  nihil  faciens,  in  alteram  partem  declinando.  Huic  sententiae  quis  erit  locus,  si  non  firmam  ac  constantem,  nullisque  machinis  expugnabilem  in  scripturis  certitudinem  habeat  Dei  veritas?  Itaque  postea  concludit,  credere  se,  nihil  ad  salutem  necessarium  esse  cognitu,  quod  non  habeat  clarissimam  in  scripturis  approbationem.  Nunc  sancti  viri  imperitiam  subsannet  Pighius,  quod  disputando  non  assuetus,  ita  rem  habere  falso  putaret.  Atqui  hoc  scribebat  iam  senex,  quum  toto  vitae  curriculo,  continuis  adversus  varios  haereticos  certaminibus  paene  detritus,  experientia  satis  teneret,  quantum  et  ad  docendum  et  ad  pugnandum  valeant  scripturae.