41:271  271  PRAELECTIONES  272  Quoniam  ergo  Mahomet  fraenum  laxavit  variis  libidinibus,  et  voluit  viros  sibi  sumere  plures  uxores,  habet  hoc  aliquid  coloris,  quod  non  fuerit  attentus  ad  mulierum  amorem.  Qui  vero  de  papa  hunc  locum  intelligunt,  proponunt  in  medium  caelibatum,  cuius  praetextu  coniugii  honor  fuit  quasi  pedibus  calcatus.  Nam  scimus  quam  foede  latrent  romani  pontifices,  ubi  agitur  de  coniugio.  Dicunt  enim  eos  qui  sunt  in  carne  non  posse  Deo  placere.  Ita  comparant  scortationi  coniugium,  et  ita  probrose  ac  contumeliose  conspuunt  adversus  illum  ordinem  a  Deo  sancitum*).  Videmus  ergo  hoc  non  prorsus  carere  aliquo  colore:  sed  reliqua  non  conveniunt.  Dicunt  quidam  etiam  aliquid,  nempe  quod  Mahomet  fabricaverit  novam  religionis  formam,  sicut  et  papa.  Caeterum,  iam  dictum  fuit,  neque  ad  Mahometum,  neque  ad  papam  posse  hoc  trahi.  Ratio  est,  quia  voluit  sustinere  Deus  animos  suorum  usque  ad  Christi  exhibitionem.  Ergo  per  angelum  suum  praedixit  quaecunque  ferenda  erant  ecclesiae,  donec  Christus  esset  in  carne  manifestatus.  Veniamus  igitur  nunc  ad  Romanos,  de  quibus  coepimus  hunc  locum  exponere.  Dicit  angelus,  Non  intelliget  rex  ille  ad  deos  patrum  suorum.  Quomodo  hoc  debeat  accipi  primo  intuitu  obscurum  esset,  verum  si  expendimus  quanta  fuerit  in  Romanis  superbia,  imo  etiam  barbaries,  nihil  nobis  ambiguum  erit  in  prophetae  verbis.  Duo  enim  hic  ponit  angelus,  nempe  regem  fore  contemptorem  omnium  deorum,  deinde  adiungit,  fore  tamen  deum  aliquem  quem  colet,  et  quidem  magnifice  et  singulari  pompa,  quae  excedet  communem  usum.  Haec  duo  videntur  inter  se  contraria,  et  tamen  reperiuntur  in  ipsis  Romanis.  Sed  ut  tota  res  melius  pateat,  addamus  etiam  sequentem  versum.  38.  Et  deum  fortitudinum  (vel  munitionum)  in  loco  suo  honorabit:  et  deum  quem  non  cognoverunt  patres  eius  honorabit  cum  auro,  et  argento,  et  lapide  pretioso,  et  desiderabilibus  (hoc  est,  rebus  omnibus  pretiosis).  39.  Et  faciet  adversus  munitiones  fortitudinum  cum  deo  alieno,  quem  agnoverit,  multiplicabit  gloriam,  et  dominari  faciet  eos  in  multis,  et  terram  dividet  pretio.  Quemadmodum  iam  attigi,  primo  intuitu  haec  inter  se  pugnant,  quod  rex  de  quo  hic  agitur,  contemnet  omnes  deos,  et  tamen  colet  non  vulgari  modo  aliquem  deum.  Hoc  autem  optime  convenit  Romanis,  si  respicimus  eorum  ingenia  et  mores.  Utcunque  enim  fuerint  valde  negotiosi  in  cultu  deorum  suorum,  constat  tamen  eos  caruisse  omni  *)  Vide  decreta  Siricii  papae  cap.  7,  tomo  Conciliorum  primo.