52:270  Particula  universalis  semper  ad  hominum  genera  referri  debet,  non  ad  personas:  ac  si  dixisset,  non  solos  Iudaeos,  sed  gentiles  quoque:  non  solos  plebeios,  sed  etiam  principes  redemptos  esse  morte  Christi.  Quum  itaque  commune  mortis  suae  beneficium  omnibus  esse  velit,  iniuriam  illi  faciunt  qui  opinione  sua  quempiam  arcent  a  spe  salutis.  Homo  Iesus.  Hominem  dum  praedicat,  non  negat  esse  Deum  :  sed  quum  vinculum  notare  vellet  nostrae  cum  Deo  coniunctionis,  humanae  potius  naturae  meminit  quam  divinae.  Quod  sedulo  observandum  est.  Hinc  enim  factum  est  ab  initio,  ut  homines  sibi  hos  vel  illos  fingendo  mediatores  longius  a  Deo  recesserint,  quia  hoc  errore  praeoccupati,  Deum  procul  abesse,  quo  se  verterent  nesciebant.  Huic  malo  Paulus  medetur,  quum  nobis  Deum  quasi  praesentem  sistit,  quia  ad  nos  usque  descendit,  ne  supra  nubes  quaerendus  esset.  Idem  ergo  hic  dicitur  quod  ad  Hebraeos  capite  4,  15,  Non  habemus  pontificem  qui  compati  infirmitatibus  nostris  nequeat:  quum  tentatus  fuerit  per  omnia.  Et  sane  si  id  omnium  animis  insideret,  porrigi  nobis  fraternam  manum  a  filio  Dei,  et  naturae  societate  nobis  coniunctum,  ut  nos  ex  hac  nostra  tam  abiecta  conditione  in  coelum  usque  attollat:  quis  non  rectam  hanc  viam  tenere  mallet  quam  in  deviis  salebris  vagari?  Proinde  quoties  orandus  est  Deus,  si  in  mentem  venit  sublimis  illa  et  inaccessa  maiestas,  ne  eius  formidine  absterreamur:  simul  occurrat  etiam  homo  Christus  qui  comiter  nos  invitat,  nosque  veluti  manu  prehensat,  qui  patrem  ex  formidabili  ac  tremendo  propitium  et  facilem  nobis  reddat.  Haec  sola  clavis  est,  qua  nobis  ianua  coelestis  regni  reseratur,  ut  appareamus  cum  fiducia  in  Dei  conspectum.  Proinde  etiam  videmus  Satanam  omnibus  saeculis  hunc  lapidem  volvisse,  ut  inde  homines  averteret.  Omitto  quam  variis  artibus  ante  Christi  adventum  distraxerit  hominum  mentes  ad  media  comminiscenda  quibus  ad  Deum  pervenirent.  Iam  ab  ecclesiae  christianae  exordio,  quum  nuper  apparuisset  Christus  cum  tam  praeclaro  pignore:  et  adhuc  in  terris  ex  eius  ore  suavissima  illa  vox  propemodum  resonaret:  Venite  ad  me  omnes,  ete.  (Matth,  l  l  ,  28):  erant  tamen  quidam  fallendi  artifices,  qui  angelos  pro  mediatoribus  obtruderent  ipsius  loco  :  quemadmodum  ex  epistola  ad  Colossenses  (2,  18)  colligere  promptum  est.  Sed  quod  tunc  clanculum  moliebatur  Satan,  sub  papatu  eo  usque  perduxit,  ut  vix  millesimus  quisque  mediatorem  Christum  vel  titulo  tenus  agnosceret.  Atque  ita  sepultum  erat  nomen,  ut  res  magis  esset  ignota.  Nunc  postquam  sanos  piosque  doctores  excitavit  Deus,  qui  tanquam  postliminio  revocare  in  hominum  memoriam  studuerunt  quod  unum  ex  notissimis  fidei  nostrae  principiis  esse  debuerat:  omnia  excogitant  Romanenses  sophistae  quibus  rem