51:270  mais  plustost  que  c'est  pour  nous  retirer  du  mal,  auquel  nous  estions  plongez.  Car  de  nature  nous  ne  pouvons  que  provoquer  l'ire  de  Dieu  et  tousiours  l'iniquite  regnera  en  nous  et  nous  sommes  detenus  sous  les  liens  et  la  tyrannie  de  Satan.  Il  faut  donc  que  Dieu  besongne  et  qu'il  nous  change:  car  tout  bien  procede  de  son  election,  dit  sainct  Paul.  Voila  donc  ou  il  a  voulu  ramener  les  fideles,  a  fin  qu'ils  scachent  que  comme  Dieu  les  a  eleus  par  sa  bonte  gratuite,  aussi  ne  leur  donne-il  point  conge  de  s'addonner  a  tous  vices  :  mais  il  les  veut  garder  et  conserver  impollus  a  soy  :  car  ce  sont  choses  coniointes  et  inseparables,  que  Dieu  nous  ait  eleus,  et  que  maintenant  il  nous  appelle  a  sainctete.  Comme  aussi  sainct  Paul  dit  en  l'autre  passage,  que  nous  ne  sommes  point  appelez  a  pollution  et  ordure:  mais  a  estre  dediez  a  Dieu  en  toute  piete  et  sainctete.  Pource  que  nous  ne  pouvons  pas  deduire  le  tout  maintenant,  regardons  a  faire  nostre  profit  de  ceste  doctrine.  Et  mesmes  maintenant  que  nous  avons  a  nous  preparer  a  recevoir  la  Cene  de  nostre  Seigneur  Iesus  Christ,  qui  nous  est  un  gage,  tant  de  nostre  election,  que  de  l'esperance  de  nostre  salut  et  de  tous  les  biens  spirituels  qui  procedent  de  ceste  source  et  fontaine  de  l'amour  gratuite  de  Dieu:  que  nous  cognoissions  que  Dieu  desploye  la  ses  richesses  envers  nous,  et  que  ce  n'est  pas  a  fin  que  nous  en  abusions:  mais  plustost  qu'il  en  veut  estre  glorifie  de  nous,  et  non  seulement  de  nostre  bouche,  mais  en  toute  nostre  vie.  Et  puis  qu'ainsi  est  que  nous  tenons  de  luy,  que  nous  apprenions  aussi  d'estre  siens,  d'estre  addonnez  a  son  obeissance,  qu'il  iouisse  paisiblement  de  nous:  et  que  nous  tendions  tousiours  a  ce  but-la,  c'est  que  pour  avoir  une  certaine  approbation  qu'il  nous  tient  et  advoue  pour  ses  enfans,  que  nous  portions  ses  marques,  et  qu'en  l'invoquant  comme  nostre  Pere,  nous  monstrions  par  effect  que  nous  sommes  vrayement  gouvernez  par  son  sainct  Esprit.  Voila  donc  en  somme  ce  que  nous  avons  a  observer  de  ce  passage,  iusques  a  ce  que  le  reste  s'ensuyve.  Or  nous  nous  prosternerons  devant  la  maieste  de  nostre  bon  Dieu  etc.  TROISIEME  SERMON.  Chap.  I,  v.  4.6.  Nous  avons  commence  a  monstrer  ce  matin,  qu'il  n'est  pas  licite  sous  ombre  que  Dieu  nous  a  eleus  devant  que  le  monde  fust  cree,  de  nous  lascher  la  bride  a  toute  dissolution,  comme  si  c'estoit  tout  un  de  nous  abandonner  a  mal,  d'autant  que  nous  ne  pouvons  perir  quand  Dieu  nous  a  retenus  pour  siens.  Car  il  ne  faut  point  separer  ce  qu'il  a  conioint  et  uni.  Puis  donc  qu'il  nous  a  eleus  pour  estre  saincts  et  cheminer  en  purete  de  vie,  il  faut  que  rejection  soit  comme  une  racine  qui