41:270  magis  adversum,  et  sic  non  eam  modo  refugimus,  sed  tumultuamur  contra  Deum.  Hinc  igitur  fit,  ut  qui  premuntur  manu  Dei  semper  ferociant,  nisi  ostendat  se  esse  eorum  iudicem.  Ergo  hanc  rationem  nunc  sequitur  angelus,  quod  scilicet  Deus  non  exponat  ecclesiam  suam  impiorum  libidini  temere,  sed  quia  poenas  exigere  velit  de  peccatis  suorum.  Nam  iudicium  semper  incipere  debet  a  domo  Dei,  quemadmodum  habetur  apud  alium  prophetam  (Isa.  10,  12;  Ierem.  25,  29;  1.  Pet.  4,  17).  In  summa,  hic  primo  loco  angelus  hortatur  pios  ad  resipiscentiam,  et  ostendit  merito  eos  percuti  Dei  manu,  quoniam  ita  meriti  sint.  Mitigat  tamen  quod  fuisset  alioqui  nimis  asperum,  quum  addit,  ad  finem,  vel  complementum.  Calah  significat  nunc  consumptionem,  nunc  finem,  sed  hoc  loco  pro  fine,  aut  complemento  accipitur.  Et  mox  etiam  sequitur  explicatio,  quoniam  determinatio  facta  est,  inquit,  vel  decisio,  hoc  est,  Deus  non  persequetur  ad  extremum  usque,  vel  absque  modo  filios  suos,  sed  imponet  finem  poenis,  postquam  ipsos  humiliaverit.  Quemadmodum  etiam  habetur  Isaiae  quadragesimo,  Completum  esse  tempus  militiae,  quum  Deus  misertus  ecclesiae  suae  eam  a  tyrannide  hostium  liberat.  Et  dicit  etiam  illic  Isaias  in  persona  Dei,  ecclesiam  recepisse  duplicia,  quasi  diceret,  satis  poenarum  se  exegisse,  quia  quodammodo  sibi  displicet,  ac  si  fuerit  nimis  severus  erga  ecclesiam,  quia  scimus  quam  indulgenter  cum  filiis  suis  agat.  Sic  etiam  hoc  loco  dicit,  ad  finem  usque  irae,  hoc  est,  erunt  temporales  poenae,  et  Deus  praescripsit  illis  certum  terminum,  qui  adfert  finem  omnibus  molestiis  et  malis.  Sequitur,  37.  Et  ad  deos  patrum  suorum  non  attendet,  et  ad  desiderium  (vel  amorem)  mulierum,  et  ad  ullum  deum  non  attendet,  quia  super  omne  (super  omnia)  sese  magnificabit.  Qui  exponunt  vaticinium  hoc  de  Antiocho,  non  mirum  est  si  anxie  laborent  in  his  verbis,  neque  tamen  se  expediant,  quia  nusquam  legitur  de  Antiocho  quod  angelus  praedicit,  nempe  quod  neglexerit  et  deos  omnes,  et  deum  patrum  suorum.  Deinde  quod  ad  mulierum  amorem  spectat,  hoc  non  competit  in  eius  personam.  Sed  aliis  rationibus  evincere  facile  est,  quemadmodum  dixi,  hic  nullam  fieri  Antiochi  mentionem.  Qui  autem  ad  papam,  vel  Mahometum  trahunt  hanc  prophetiam,  quod  ad  mulierum  amorem,  videntur  aliquid  adferre.  Nam  quia  Mahomet  permisit  brutam  licentiam  viris,  ut  sibi  coacervarent  uxores,  in  hoc  corrupit  fidem  coniugii,  et  aTopyfyv  illam,  quae  devincit  uxori  maritum.  Nisi  enim  contentus  sit  vir  quisque  sua  uxore,  iam  nullus  est  amor,  quia  nulla  potest  esse  fides  coniugalis  ubi  inter  pellices  aemulatio  est.