1:270  tas  sonticas  pestes  invasisse  orbem,  omnia  in  praeceps  ruere;  ut  aut  prorsus  res  humanae  deplorandae  sint,  aut  tantis  malis  iniicienda  manus,  vel  potius  vis  afferenda.  1)  Et  abigitur  remedium,  non  alia  ratione,  nisi  quia  iampridem  malis  assuevimus.  Sed  locum  sane  habeat  in  hominum  societate  publicus  error;  in  regno  tamen  Dei  sola  eius  aeterna  veritas  audienda  et  spectanda  est,  cui  nulla  annorum  serie,  nulla  consuetudine,  nulla  coniuratione  praescribi  potest.  Sic  quondam  electos  Dei  docebat  Iesaias  (Ies.  8,  12),  ne  dicerent,  conspiratio,  ad  omnia  in  quibus  populus  dicebat  conspiratio;  hoc  est,  ne  in  populi  conspirationem  et  consensum  una  ipsi  conspirarent,  neve  timorem  eius  timerent,  ac  formidarent;  sed  potius  ut  Dominum  exercituum  sanctificarent,  et  ipse  esset  timor  eorum  et  pavor.  Nunc  itaque,  ut  volent,  et  praeterita  saecula,  et  praesentia  exempla  nobis  obiectent:  si  Dominum  exercituum  sanctificaverimus,  non  valde  terrebimur.  Sive  enim  in  similem  impietatem  multa  saecula  consenserint,  fortis  est  qui  ultionem  in  tertiam  et  quartam  generationem  faciat;  sive  totus  simul  orbis  in  eandem  nequitiam  conspiret,  experimento  docuit,  quis  sit  eorum  exitus  qui  cum  multitudine  delinquunt;  quum  universum  hominum  genus  diluvio  perdidit,  servato  Noe  cum  modica  familia,  qui  per  suam  unius  fidem  totum  orbem  condemnaret  (Gen.  7,  1.  Hebr.  11,  7).  Denique  prava  consuetudo  non  secus  ac  publica  quaedam  est  pestis,  in  qua  non  minus  pereunt,  qui  in  turba  cadunt.  Adhaec  expendere  decebat,  quod  alicubi  dicit  Cyprianus:  2)  eos  qui  ignoratione  peccant,  etsi  non  possint  omni  se  culpa  eximere,  videri  tamen  posse  quoquo  modo  excusabiles;  oblatam  autem  Dei  beneficio  veritatem  qui  pertinaciter  respuunt,  nihil  habere  quod  obtendant.  Dilemmate  suo  non  adeo  vehementer  nos  premunt,  ut  fateri  adigant  vel  ecclesiam  fuisse  aliquamdiu  intermortuam  vel  nunc  cum  ecclesia  nobis  litem  esse.  Vixit  sane  Christi  ecclesia,  et  vivet  quamdiu  Christus  regnabit  ad  dexteram  patris;  cuius  1)  Decret.  dist.  8.  c.  fid.  ex.  de  consuet.  2)  Epist.  3.  lib.  2.  et  in  epist.  ad  Iulianum  de  haeret.  baptizand.  (al.  73).