27:27  27  SERMON  LXX.  28  toutes  affections,  et  solicitudes  terrestres?  Encores  que  Dieu  donne  des  biens  a  aucuns,  qu'ils  soyent  la  comme  brebis,  estans  petits  et  humbles  pour  se  presenter  a  Dieu,  que  rien  ne  les  empesche  et  retarde  qu'ils  ne  suyvent  leur  vocation,  tousiours  aspirans  a  la  vie  celeste,  a  laquelle  ils  sont  conviez.  Voila  donc  ce  que  nous  avons  a  retenir  en  general,  quand  nous  aurons  cogneu  que  Dieu  veut  que  les*  Ministres  de  sa  parolle  et  les  pasteurs  de  son  Eglise  soyent  nourris,  et  substantez:  que  nous  sachions  aussi  bien  d'autant  que  nous  sommes  tous  une  sacrificature  royalle,  qu'il  ne  veut  point  que  nous  soyons  retenus  des  biens  de  ce  monde,  tellement  que  nous  ne  regardions  point  plus  haut:  mais  que  nous  courions  viste  parmi  le  monde,  sachans  que  nous  ne  pouvons  pas  estre  enfans  du  royaume  des  cieux,  sinon  que  nous  soyons  estrangers  ici  bas.  Or  Moyse  apres  avoir  declaire  ces  choses,  adiouste  encores  un  mot:  Iusques  auiourd'huy,  en  signifiant  que  Dieu  vouloit  que  ceci  fust  observe.  Il  est  vray  que  cela  n'avoit  encores  dure  que  par  quarante  ans:  mais  tant  y  a  que  Moyse  advertit  le  peuple,  qu'il  ne  faut  point  qu'on  pervertisse  cest  ordre:  mais  qu'on  le  continue  iusques  a  tant  que  le  Redempteur  sera  venu.  Il  est  vray  que  les  sacrificateurs  ont  este  fort  desbauchez,  et  qu'ils  avoyent  tout  perverti,  et  qu'ils  estoyent  bien  dignes  que  Dieu  leur  quittast  son  alliance,  et  qu'il  leur  ostast  le  privilege  qu'il  avoit  donne  a,  leur  pere  Levi,  comme  ce  passage  du  Prophete  Malachie  le  porte,  qui  dit  que  Dieu  avoit  fait  son  alliance  avec  Levi:  mais  si  est-ce  que  maintenant  d'autant  que  vous  estes  des  apostats,  et  que  vous  n'avez  point  garde  la  foy  promise  a  Dieu,  vous  meritez  d'estre  retranchez,  et  Dieu  aussi  maudira  toutes  vos  benedictons:  c'est  a  dire,  quand  vous  penserez  avoir  beaucoup  gagne,  il  faudra  que  Dieu  souffle  dessus,  et  qu'il  monstre  qu'il  n'y  a  qu'opprobre  en  vous.  Mais  tant  y  a  qu'encores  la  sacrificature  devoit  durer  iusques  a  la  venue  de  nostre  Seigneur  Iesus  Christ,  comme  elle  a  fait.  Et  auiourd'huy  notons  bien  que  quand  les  choses  seront  mal  conduites  en  l'Eglise,  que  tout  y  sera  confus,  qu'il  faut  bien  corriger  le  mal:  mais  il  ne  faut  pas  pourtant  que  ce  que  Dieu  a  institue,  soit  perdu,  que  nous  le  laissions,  et  que  nous  ne  vueillions  point  le  mettre  en  avant  par  despit  des  vices,  et  des  scandales  qui  auront  tout  brouille:  mais  revenons  tousiours  a  la  pure  reigle  de  Dieu.  Nous  voyons  que  ce  sont  este  des  diables  encharnez,  que  ceux  qui  se  sont  glorifie  d'estre  prelats,  evesques,  et  pasteurs.  Or  maintenant  si  en  despit  de  telles  corruptions  on  vouloit  abolir  tout  ordre  d'Eglise,  qu'il  n'y  eust  plus  de  ministres,  qu'il  n'y  eust  plus  gens  deputez  pour  enseigner  le  peuple:  que  seroit-ce  sinon  une  confusion  horrible,  sinon  que  l'enfer  seroit  ouvert,